150

دبئی ٹیسٹ؛ آسٹریلیا کے خلاف پاکستان کی دوسری اننگز میں بیٹنگ جاری

دبئی ٹیسٹ کے تیسرے دن پاکستان کے خلاف آسٹریلیا کی ٹیم پہلی اننگز میں 202 رنز بناکر آؤٹ ہوگئی تاہم قومی ٹیم نے آسٹریلیا کو فالوآن نہ کرواکر بیٹنگ کا فیصلہ کیا ہے۔

دبئی میں کھیلے جارہے پہلے ٹیسٹ میچ کے تیسرے دن پاکستان نے آسٹریلیا کو فالوآن نہ کرواکر بیٹنگ کا فیصلہ کیا ہے۔ قومی ٹیم کی جانب سے اننگز کا آغاز امام الحق اور محمد حفیظ نے کیا ہے۔

اس سے قبل آسٹریلیا کی ٹیم پہلی اننگز میں 202 رنز بناکر آؤٹ ہوگئی، آسٹریلیا نے گزشتہ روز کھیل کے اختتام پر بغیر کسی نقصان کے صرف 30 رنز بنائے تھے تاہم آج کھیل کے تیسرے دن آسٹریلیا نے اننگز کا آغاز کیا تو اوپنرز نے 142 رنز کی شراکت قائم کی۔

عثمان خواجہ اور ایرون فنچ نے نصف سنچریاں مکمل کیں تاہم ایرون فنچ 62 اور عثمان خواجہ 85 رنز بناکر آؤٹ ہوگئے، آسٹریلیا کی جانب سے ون ڈاؤن آنے والے شان مارچ نے صرف 7 رنز بنائے جب کہ ٹراوس ہیڈ بغیر کوئی رن بنائے پویلین واپس لوٹ گئے، اوپنرز کے بعد آسٹریلیا کا کوئی بھی کھلاڑی زیادہ دیر تک وکٹ پر کھڑا نہ رہ سکا، آسٹریلیا کے 4 کھلاڑی صفر پر آؤٹ ہوئے۔

پاکستان کی جانب سے بلال آصف نے 6 کھلاڑیوں کو پویلین کی راہ دکھائی جب کہ محمد عباس نے 4 وکٹیں حاصل کی۔

دوسرا دن؛

ٹیسٹ میچ کے دوسرے دن قومی ٹیم نے کھیل کا آغاز 3 وکٹوں کے نقصان پر 255 رنز سے کیا تو صرف 5 رنز کے اضافے سے محمد عباس آؤٹ ہوگئے۔ حارث سہیل اور اسد شفیق کے درمیان 150 رنز کی شراکت قائم ہوئی تاہم اسد شفیق 80 رنز بناکر پویلین واپس لوٹ گئے۔

بابر اعظم  4 رنز بناکر رن آؤٹ ہوئے جب کہ حارث سہیل نے سنچری اسکور کی اور 110 رنز بنانے کے بعد آؤٹ ہوئے۔ کپتان سرفراز احمد 15 رنز بنا کر رن آؤٹ ہوئے ، بلال آصف 12 اور یاسر شاہ 3 رنزبناسکے۔

آسٹریلیا کی جانب سے پیٹرسڈل نے 3، نیتھن لیون نے 2 جب کہ جون ہولاند، مارنس لیبسچگنی اور مچل اسٹارک نے ایک ایک وکٹ حاصل کی۔

پہلا دن؛

ٹیسٹ میچ کے پہلے دن قومی ٹیم کے کپتان سرفراز احمد نے ٹاس جیت کر پہلے بیٹنگ کا فیصلہ تو پاکستان کی جانب سے اننگز کا آغاز محمد حفیظ اور امام الحق نے انتہائی پراعتماد انداز میں کیا اور دونوں اوپنرز نے 205 رنز کی شراکت قائم کی جس کے بعد  امام الحق 76 رنز بناکر آؤٹ ہوگئے۔

محمد حفیظ نے شاندار کھیل پیش کیا اور سنچری مکمل کی تاہم وہ 126 رنز بناکر پویلین لوٹ گئے، تیسرے آؤٹ ہونے والے بیٹسمین اظہر علی تھے جو 18 رنز پر ہالینڈ کی گیند پر اسٹارک کو کیچ تھما بیٹھے۔

واضح رہے کہ متحدہ عرب امارات میں دونوں ٹیموں کے درمیان آخری ٹیسٹ میچ 2014 میں کھیلا گیا تھا جس میں قومی ٹیم نے آسٹریلیا کو 221 رنز سے شکست دی تھی۔