لاہور: مریم نوازشریف نے کہا ہے کہ پولیس قربانی دے رہی ہے مگر کالی بھیڑیں بھی موجود ہیں۔
وزیر اعلیٰ پنجاب مریم نواز شریف کی زیر صدارت خصوصی اجلاس ہوا جس میں صوبے بھر میں امن و امان کی صورتحال کا جائزہ لیا گیا۔ آئی جی پنجاب نے امن و امان کی مجموعی صورتحال اور پولیس کی کارکردگی کے بارے میں بریفنگ دی۔ اجلاس میں پنجاب کی جیلوں میں پیشہ ور فقیروں کے لیے ”بیگر بیرک“ کے قیام کے تجویز پر اتفاق کیا گیا۔
مریم نوازشریف نے کہا کہ 13کروڑ عوام کو جوابدہ ہوں،پولیس کرائم کنٹرول کرے، حقائق سے آنکھیں بند نہیں کی جاسکتیں، پنجاب میں کسی جگہ پر بھی نو گو ایریا برداشت نہیں۔
انہوں نے زور دیا کہ صوبے بھر میں کرائم ریٹ کو ہر صورت نیچے لانا ہوگا، جرائم زیادہ ہوتو عوام حکومت کی ریفارمز اور ڈویلپمنٹ بھول جاتی ہے، پولیس قربانی بھی دے رہی ہے مگر کالی بھیڑیں بھی موجود ہیں، پولیس کے ساتھ ہوں، فورس کے پیچھے کھڑی ہوں، یونیفارم پہن کر اظہار یکجہتی کیا۔
مریم نوازشریف نے کہا کہ لاہورمیں ڈکیتی کے واقعات میں 50فیصد سے زائد کمی خوش آئند ہے، پولیس کے امور میں سیاسی مداخلت ختم کرادی، اب پولیس پرفارم کرے، ڈی پی او حضرات اپنے ڈسٹرکٹ کو کرپٹ اہلکاروں اور جرائم پیشہ افراد سے پاک کریں۔
