آئی سی سی ٹی ٹوئنٹی ورلڈ کپ کے اہم میچ سنسنی خیز مقابلے کے بعد جنوبی افریقہ نے ویسٹ انڈیز کو شکست دے کرسیمی فائنل میں رسائی حاصل کرلی۔
سپر ایٹ کے گروپ 2 میں شامل دونوں ٹیمیں نارتھ ساؤنڈ میں آمنے سامنے تھیں، جہاں جنوبی افریقہ نے ٹاس جیت کر فیلڈنگ کا فیصلہ کیا تھا۔
ویسٹ انڈیز کی ٹیم پہلے بیٹنگ کرتے ہوئے مقررہ 20 اوورز میں 8 وکٹوں کے نقصان پر 135 رنز اسکور کرسکی اور جنوبی افریقہ کو جیت کے لیے 136 رنز کا ٹارگٹ دیا۔
روسٹن چیز 52، کائل مائرز 35 اور آنڈرے رسل 15 رنز بنا کر پویلین لوٹ گئے، جبکہ الزاری جوزف 11 رنز بنا کر ناؤٹ رہے، اس کے علاوہ کوئی کھلاڑی ڈبل فیگر میں داخل نہیں ہو سکا۔
جنوبی افریقہ کی جانب سے تبریز شمسی نے 3، مارکو جانسن، ایڈن مارکرم، کیشو ماہراج اور کگیسو رباڈا نے ایک ایک کھلاڑی کو پویلین کی راہ دکھائی۔
جنوبی افریقہ نے ہدف کے تعاقب میں اپنی اننگز کا آغاز کیا تو 2 اوورز کے بعد بارش ہو گئی اور کھیل روک دیا گیا، جس کی وجہ سے جنوبی افریقہ کو 17 اوورز میں جیت کے لیے 123 رنز کا ہدف ملا۔
جنوبی افریقہ کے ٹرسٹن اسٹبز 29، ہنرک کلاسن 22، کپتان ایڈن مارکرم 18 اور کوئنٹن ڈی کک 12 رنز بنا کر آؤٹ ہوئے جبکہ مارکو جانسن نے ناقابل شکست 21 اسکور کئے۔
