قومی ٹیم کے کپتان شان مسعود نے بنگلادیش کیخلاف راولپنڈی ٹیسٹ کے آغاز سے قبل حکمت عملی کا انکشاف کردیا۔
راولپنڈی میں ٹرافی کی رونمائی کے بعد میڈیا سے گفتگو کرتے ہوئے قومی ٹیسٹ ٹیم کے کپتان شان مسعود نے کہا کہ فاسٹ بولر کو اسکواڈ میں شامل کرنے کی وجہ راولپنڈی کی پچ ہے کیونکہ وہاں پیسرز کو زیادہ مدد ملتی ہے جبکہ اسپنرز کا کردار موثر نہیں۔
کپتان سے سوال کیا گیا کہ میر حمزہ کی جگہ محمد علی کو اسکواڈ میں کیوں شامل کیا گیا؟ جس پر شان مسعود نے جواب دیا کہ نوجوان کرکٹر نے حالیہ سیریز میں شاندار بالنگ کا مظاہرہ کیا ہے جبکہ اوور کاسٹ کنڈیشنز میں وہ ہمیں وکٹیں لیکر دے سکتے ہیں۔
انہوں نے کہا کہ بالنگ لائن اَپ میں شاہین آفریدی، نسیم شاہ بھی ٹیم کو جلد وکٹیں دلوانے میں اہم کردار ادا کریں گے، دونوں کرکٹرز میں سوئنگ اور سیم کی اچھی خوبیاں ہیں جو ٹیم کیلئے فائدہ مند ہوسکتی ہے۔
واضح رہے کہ پاکستان اور بنگلادیش کے درمیان دو ٹیسٹ میچز پر مشتمل سیریز کا پہلا میچ 21 اگست (کل) سے شروع ہوگا جبکہ دوسرا ٹیسٹ اسی میدان پر 30 اگست سے 3 ستمبر تک کھیلا جائے گا۔
