پاکستان کرکٹ بورڈ (پی سی بی) نے ایک غیر متوقع فیصلہ کرتے ہوئے قومی ویمن ون ڈے کرکٹ ٹورنامنٹ کو دوبارہ شروع کرنے کا اعلان کیا ہے۔ فائنلسٹ ٹیموں کے اعلان کے بعد، یہ ٹورنامنٹ جمعرات سے پانچ ٹیموں کے درمیان دوبارہ شروع ہوگا۔
ٹورنامنٹ میں پانچ ٹیمیں—چیلنجرز، کانکرز، انوسیبلز، اسٹارز، اور اسٹرائیکرز—ڈبل لیگ فارمیٹ میں ایک دوسرے کے مدمقابل آئیں گی۔
پہلے روز، کانکرز کی ٹیم کا مقابلہ چیلنجرز سے کے آر ایل گراونڈ، راولپنڈی میں ہوگا، جبکہ اسلام آباد کے مرغزار کرکٹ گراونڈ پر اسٹرائیکرز کا مقابلہ اسٹارز سے ہوگا۔
ٹورنامنٹ کی فاتح ٹیم کو 33 لاکھ روپے انعام ملے گا، رنر اپ کو 15 لاکھ روپے اور تیسری پوزیشن پر آنے والی ٹیم کو 10 لاکھ روپے ملیں گے۔
اس ٹورنامنٹ میں پاکستان کے معروف کرکٹرز بطور مینٹورز خدمات انجام دیں گے، جن میں وقار یونس چیلنجرز، مصباح الحق کانکرز، سرفراز احمد انوسیبلز، شعیب ملک اسٹارز اور ثقلین مشتاق اسٹرائیکرز کے مینٹورز ہوں گے۔
ابتداء میں، 8 نومبر کو کراچی میں حنیف محمد ریجنل ہائی پرفارمنس سینٹر کے اوول گراؤنڈ اور یوبی ایل گراونڈ پر ٹورنامنٹ کا آغاز ہوا تھا، لیکن 18 نومبر کو پی سی بی نے ٹیم ہوٹل میں آگ لگنے کے حادثے کے بعد ٹورنامنٹ کو روک دیا تھا۔ اس کے بعد پانچ راؤنڈز کے مکمل ہونے پر انوسیبلز اور اسٹارز کو فائنل کے لیے منتخب کیا گیا تھا۔
ایونٹ کا فائنل 22 دسمبر کو کے آر ایل گراونڈ پر کھیلا جائے گا۔
