2024 کھیلوں کے لیے ایک اہم سال ثابت ہوا،جس میں ٹی ٹوئنٹی ورلڈکپ، اولمپک گیمز ،باکسنگ سمیت کئی بڑے مقابلے ہوئے جنہیں شائقین کی جانب سے خوب پذیرائی ملی۔
دنیا میں مختلف کھیلوں سے وابستہ مشہور کھلاڑیوں کے بارے میں مداح ہمیشہ کچھ نیا جاننا چاہتے ہیں جس کے لیے وہ انٹرنیٹ پر گوگل سرچ انجن کا سہارا لیتے ہیں۔
2024 میں بھی دنیا میں کئی مشہور ایتھلیٹس کو گوگل پر کافی سرچ کیا گیا جس کی فہرست سامنے آگئی ہے۔
بھارتی میڈیا کے مطابق اس فہرست میں گوگل پر دنیا میں سب سے زیادہ سرچ کیے جانے والے ایتھلیٹس کے نام شامل ہیں۔
اس فہرست میں 2 بھارتی کرکٹرز بھی شامل ہیں لیکن حیران کن طور پر وہ نام دنیا کے سب سے بہترین بیٹر ویرات کوہلی اوربھارتی کپتان روہت شرما کے نہیں ہیں۔
بھارتی میڈیا کے مطابق دنیا میں جس بھارتی کرکٹر کو سب سے زیادہ سرچ کیا گیا ہے وہ آل راؤنڈر ہاردک پانڈیا ہیں جبکہ اس فہرست میں دوسرا نام آئی پی ایل میں پنجاب کنگز کے کھلاڑی ششانک سنگھ کا ہے۔
2024 میں سب سے زیادہ گوگل کیے جانے والے ایتھلیٹس کی فہرست:
1: الجیرین باکسر ایمان خلیف
الجیرین باکسر ایمان خلیف 2024 میں گوگل پر سب سے زیادہ سرچ کیے جانے والی ایتھلیٹ ہیں۔
ایمان خلیف نے رواں سال پیرس اولمپک گیمز 2024 میں بطور خاتون طلائی تمغہ جیتا تھا اور وہ ایونٹ کے دوران اپنی جسمانی ساخت کی وجہ سے خبروں کی زینت بنی رہی تھیں۔
معاملہ اس وقت خبروں کی زینت بنا تھا جب ایونٹ کے پہلے راؤنڈ میں اٹالین باکسر اینجلا کیرینی نے صرف 46 سیکنڈز کے بعد ہی ایمان خلیف سے لڑنے سے انکار کردیا تھا اور کہا تھا کہ یہ نا انصافی ہے کیونکہ اُن کے خیال میں الجیرین حریف خاتون باکسر ہونے کے معیار پر پورا نہیں اُترتیں۔
بعدازاں ایمان خلیف نے نہ صرف تمام فائٹس جیتیں بلکہ فیصلہ کن معرکے میں بھی کامیابی حاصل کرکے اس گیمز میں الجزائر کو دوسرا گولڈ میڈل جتوایا۔
تاہم پیرس اولمپکس کے بعد غیرملکی میڈیا میں یہ خبر سامنے آئی کہ ایمان خلیف کی میڈیکل رپورٹ لیک ہوگئی جس میں انکشاف ہوا ہے کہ 25 سالہ باکسر خاتون نہیں بلکہ مرد ہے۔
2: مائیک ٹائی سن
رواں سال نومبر میں 19 سال بعد باکسنگ ارینا میں واپس اترنے والے سابق ہیوی ویٹ چیمپئن مائیک ٹائی سن 2024 میں گوگل پر سب سے زیادہ سرچ کیے جانے والے ایتھلیٹس کی فہرست میں دوسرے نمبر پر ہیں۔
58 سالہ مائیک ٹائی سن کا مقابلہ اپنی عمر سے 31 برس چھوٹے باکسر جیک پال سے تھا جس میں وہ پہلے ہی میچ میں شکست کھا گئے تھے۔
3: لامین یمال
رواں سال یوروکپ میں شاندار کارکردگی کا مظاہرہ کرنے والے اسپینش فٹبال اسٹار لامین یمال بھی 2024 میں گوگل پر سب سے زیادہ سرچ کیے جانے والے ایتھلیٹس کی فہرست میں شامل ہیں۔
یورو کپ میں اسپین کے 17 سالہ فٹبالر لامین یمال نے دنیا کے سامنے خود کو منوایا اور انہیں یوروکپ 2024 کا ’ینگ پلیئر آف دی ٹورنامنٹ‘ کا ایوارڈ دیا گیا تھا۔
4: امریکی جمناسٹ سمون بائلز
5: جیک پال(امریکی باکسر)
6: نکو ولیئمز(اسپینش فٹبالر)
7: ہاردک پانڈیا( بھارتی کرکٹر)
8: اسکاٹی شیفلر(امریکی گولفر)
9: ششانک سنگھ( بھارتی کرکٹر)
10: رودری( اسپینش فٹبالر)
