438

بھارت میں سلمان خان اور کترینہ کی شادی کے چرچے

ممبئی:بالی ووڈ کے سلطان سلمان خان اور باربی ڈول کترینہ کیف بہت جلد فلم ’بھارت‘ میں شادی کے بندھن میں بندھ جائیں گے۔

بالی ووڈ کے دبنگ خان اداکار سلمان خان کے دنیا بھر میں موجود اُن کے مداح ہمیشہ ایک ہی سوال کرتے ہیں کہ وہ کب شادی کریں گے؟ تاہم سلمان خان نے اس بار اپنے مداحوں کی خواہش کو پورا کرنے کی ٹھان لی ہے مگر وہ یہ شادی حقیقت میں نہیں بلکہ نئی آنے والی فلم میں کریں گے۔

بھارتی میڈیا کے مطابق سلو میاں اور کترینہ کیف ان دنوں فلم بھارت کی شوٹنگ میں مصروف ہیں جس کو مختلف مراحل میں فلمایا جا رہا ہے۔ ان دنوں اداکار ایک گیت کے لیے شادی کی شوٹنگ کر رہے ہیں اور اس بات کا اظہار سلمان خان پہلے ہی کپل شرما کے شو میں کر چکے ہیں کہ وہ فلم میں اُس وقت تک شادی نہیں کریں گے جب تک کہ وہ 72 سال کے نہیں ہوجاتے۔

سلمان خان کے قریبی ذرائع نے تصدیق کرتے ہوئے کہا کہ فلم میں بہت سے گیت ہیں تاہم ان دنوں جو گیت فلمایا جارہا ہے وہ شادی کے سین پر مبنی ہے اس گیت کو فلمانے کے لیے بے تحاشا پھولوں سمیت بہت سی دیگر آرائشی اشیا استعمال کی جا رہی ہیں اس شادی کو اُن کے مداح عید کے موقع پر دیکھ سکے گے۔

واضح رہے کہ علی عباس ظفر کی ہدایت کاری میں بننے والی فلم ’بھارت‘ میں سلمان خان کے ہمراہ کترینہ کیف اور کینیڈین اداکارہ نورا فتیحی کے علاوہ دیشا پٹانی، تبو، سنیل گروور بھی اداکاری کے جوہر دکھائیں گے۔ یہ فلم 2019ء میں عید کے موقع پر سنیما گھروں کی زینت بنے گی۔