215

نیویارک میں محمد علی جناح کے نام سے منسوب سڑک کا افتتاح 

واشنگٹن۔ امریکی حکام نے بانی پاکستان قائداعظم محمد علی جناح کے نام سے منسوب نیویارک کی اہم ترین شاہراہ کا افتتاح کردیا،محمد علی جناح وے کی افتتاحی تقریب میں پاکستانی عوام کے علاوہ امریکی شہری بھی موجود تھے،سٹی کونسل کے رکن جمانے ولیمز نے کہا کہ یہ میرے لیے اعزاز کی بات ہے کہ محمد علی جناح وے کی افتتاحی تقریب موقع پر موجود ہوں ۔

تفصلات کے مطابق امریکی شہر نیویارک کی سٹی کونسل نے قائد اعظم کی خدمات کا اعتراف کرتے ہوئے ایک قرار داد کے تحت بروکلین ٹا ؤ ن کی کونی آئی لینڈ شاہراہ کے ایک حصے کا نام محمد علی جناح وے رکھ دیا ہے جو پاکستانیوں کے لیے ایک اعزاز ہے۔ 

بروکلین ٹا ؤ ن کونی آئی لینڈ کی شاہراہ کو قائد اعظم کے نام سے منسوب کرنے کا فیصلہ گزشتہ برس دسمبر میں کیا گیا تھا جس کا افتتاح اب کیا گیا ہے۔محمد علی جناح وے کی افتتاحی تقریب میں پاکستانی عوام کے علاوہ امریکی شہری بھی موجود تھے جبکہ تقریب کے مہمان خصوصی نیویارک میں تعینات پاکستانی قونصل جنرل نعیم اقبال چیمہ تھے۔

نعیم اقبال چیمہ نے خطاب کرتے ہوئے کہا کہ افتتاح کی تقریب میں پاکستانی اور امریکی عوام کی موجودگی دونوں ملکوں کی عوام کے رابطوں اور اتحاد و اتفاق کی عکاسی کرتی ہے۔پاکستانی برادری کیلیے کام کرنے والی تنظیم پاکستانی امریکن یوتھ آرگنائزیشن صدر وکیل احمد کا کہنا تھا کہ لٹل پاکستان کے نام سے مشہور کونی آئی لینڈ کو قائداعظم کے نام منسوب کرکے سٹی کونسل نے ہمارے دیرینہ مطالبے کو پورا کیا ہے۔

تقریب میں موجود سٹی کونسل کے رکن جمانے ولیمز نے کہا کہ یہ میرے لیے اعزاز کی بات ہے کہ محمد علی جناح وے کی افتتاحی تقریب موقع پر موجود ہوں۔جما نے ولیمز نے کہا کہ مجھے اس بات کا علم ہے کہپاکستانی عوام نائن الیون کے بعد سے مشکلات کا شکار ہے لیکن پاکستانی قوم مشکلات کا سامنا کرنے کے بعد ایسے مقام پر پہنچ گئی ہے کہ سٹی کونسل نے ان کے بانی کے اعزاز میں ان کے نام سے شاہراہ منسوب کردی۔

یاد رہے کہ نیویارک کی سٹی کونسل میں رکن جمانے ولیمز نے 25 دسمبر کو قائد اعظم کی سالگرہ کے موقع پر قرار داد پیش کی گئی تھی جسے اکثریت رائے سے منظور کیا گیا تھا۔