پاکستان مسلم لیگ (نواز) کی جانب سے قائد میاں نواز شریف کی 4 سال بعد پاکستان آمد سے قبل نیا پارٹی ترانہ ’ہے فخر ہمارا نواز شریف ’جاری کردیا گیا ہے۔ تقریب سے گروپ فوٹو کھنچوانے کا معاملہ سوشل میڈیا پر وائرل ہے۔
پارٹی ترانے کی ریلیز کے موقع پر منعقد کی جانے والی تقریب میں شہباز شریف، مریم نواز سمیت ن لیگی رہنماؤں نے شرکت کی تھی۔
سماجی رابطے کی ویب سائٹ ایکس پر تقریب سے کچھ ویڈیوز وائرل ہورہی ہیں۔
ویڈیو میں دیکھا جا سکتا ہے کہ لاہور میں ہونے والی اس تقریب کے دوران مریم اورنگزیب شہباز شریف کے لیے راستہ بناتی رہیں اور گروپ فوٹو بنوانے کے لیے اُن کے ساتھ کھڑی ہوگئیں۔ لیکن شہبازشریف نے حمزہ شہباز کو اپنے ساتھ کھڑا کر کے انہیں پیچھے ہٹنے کا کہا جس پر مریم دوسری طرف چلی گئیں۔
مریم اورنگ زیب کو ویڈیو میں ’سب سائیڈ پر ہو جائیں، شہباز صاحب سامنے آجائیں گروپ فوٹو ہوگا‘ کہتے ہوئے سنا جاسکتا ہے۔
اس کے بعد جب شہباز شریف اور مریم اورنگزیب گروپ فوٹو کے لیے کھڑے ہوتے ہیں، تو شہباز شریف نے مریم اورنگ زیب کو سائیڈ پر جانے اور حمزہ شہباز کو ان کی جگہ لینے کا اشارہ کیا۔
وائرل ویڈیو کے بعد ایکس پر صارفین کی جانب سے سابق وزیراعظم شہباز شریف کو تنقید کا نشانہ بنایا جارہا ہے۔
صحافی مغیث علی نے ویڈیو پوسٹ کرتے ہوئے کہا کہ ’سب سائیڈ پر ہو جائیں، شہباز صاحب سامنے آجائیں گروپ فوٹو ہوگا، پھر گروپ فوٹو میں شہبازشریف نے مریم اورنگزیب کو سائیڈ پر کرکے حمزہ شہباز کو ساتھ کھڑا کر دیا‘۔
ایک صارف نے مزاحیہ تبصرہ کرتے ہوئے کہا کہ ’مریم اورنگزیب کو عزت دو‘۔
