پاکستانی اداکارہ ماہرہ خان کی امریکا میں پاکستانی نوجوان کی محبت میں گرفتار خاتون اونیجا رابنسن سے ملاقات ہوئی۔
کراچی کے نوجوان کی محبت میں پاکستان آنے والی امریکی خاتون اونیجا رابنسن کے ساتھ ماہرہ خان کی ویڈیو سوشل میڈیا پر وائرل ہوگئی۔
امریکا میں اداکارہ ماہرہ خان سے ملاقات میں اونیجا رابنسن نے پاکستانی خاتون انسپکٹر شبانہ کو یاد کیا جن سے ان کی پاکستان میں دوستی ہوگئی تھی۔
ملاقات میں ماہرہ خان نے بھی ہیلو شبانہ کہا۔
اونیجا رابنسن نے جہاں انسپکٹر شبانہ کو یاد کیا تو وہیں وہ کراچی کی چکن بریانی بھی نہ بھولیں۔
واضح رہے کہ ماہرہ خان ان دنوں اپنی فلم "لو گرو" کی پروموشن کیلئے امریکا میں موجود ہیں۔
امریکی خاتون کے پاکستان میں گزارے گئے دن
نیویارک کی رہائشی امریکی شہری اونیجا اینڈریو رابنسن کراچی کے علاقے گارڈن کے رہائشی 19 سالہ ندال میمن کی محبت میں 11 اکتوبر کو پاکستان کے ایک ماہ کے سیاحتی ویزے پر کراچی آئی تھیں۔
19 سالہ نوجوان امریکی خاتون سے شادی کے لیے راضی تھا مگر گھر والوں نے امریکی خاتون سے شادی سے انکار کر دیا۔ویزا ختم ہونے پر خاتون کو 10 نومبر تک کراچی سے جانا تھا مگر وہ واپس نہیں گئیں اور کراچی میں دربدر رہیں۔
خاتون کا پاکستانی ویزا اور ریٹرن ٹکٹ ختم ہوا تو خاتون نے وسط جنوری میں کراچی ائیرپورٹ کے اندر جانے کی کوشش کی تو سکیورٹی نے روک لیا اور اے ایس ایف نے انہیں ائیرپورٹ پولیس کے حوالے کردیا تھا۔
پولیس کے مطابق گورنر سندھ کی مداخلت پر 27 جنوری کو 15 دن کے لیے ایگزٹ پرمٹ جاری کیا گیا اور ایک فلاحی ادارے نے خاتون کے امریکا کے ریٹرن ائیر ٹکٹ کا بندوبست کردیا تھا، خاتون کو 29 جنوری کو امریکا واپس بھیجنے کی کوشش کی گئی لیکن ائیرپورٹ پر تمام مراحل سے گزر کر خاتون نے اچانک واپس جانے سے انکار کردیا اور جہاز تک پہنچنے کے بعد ائیر لائن اسٹاف کو اسے زبردستی واپس بھیجنے کی شکایت کی جس پر ائیر لائن نے انہیں آف لوڈ کردیا تھا۔
بعد ازاں خاتون ائیرپورٹ سے ٹیکسی میں بیٹھ کر گارڈن میں مبینہ دوست کے گھر کے باہر پہنچ گئیں اور کئی دن وہاں قیام کیا پھر ایک فلاحی ادارے نے انہیں پناہ دی جس دوران طبیعت خراب ہونے پر خاتون کو چند روز قبل جناح اسپتال کے خصوصی وارڈ میں داخل کیا گیا تھا جہاں خاتون میں بائی پولر ڈس آرڈر کی تشخیص ہوئی تھی۔
کئی دن کے علاج کے بعد جناح اسپتال میں خاتون کو پانچ رکنی میڈیکل بورڈ نےسفر کے لیے فٹ قرار دے کر اسپتال سے ڈسچارج کر دیا تھا۔
تاہم پاکستانی لڑکے سے محبت میں امریکا سے کراچی آنے والی امریکی خاتون اونیجا اینڈریو رابنسن فروری میں 120 دن بعد امریکا واپس لوٹ گئی تھیں۔
