ریاض : وزیراعظم شہبازشریف سے ملاقات میں بل گیٹس نے حفاظتی ٹیکوں اور پولیو سےبچاؤ کےپروگرام کی تعریف کرتے ہوئے ملکر کام جاری رکھنے کے اپنے عزم کا اعادہ کیا۔
تفصیلات کے مطابق وزیراعظم شہبازشریف نے بل گیٹس سے ملاقات کی، ملاقات ورلڈ اکنامک فورم کے خصوصی اجلاس کے موقع پر ہوئی۔
ملاقات میں بل گیٹس نے پنجاب میں حفاظتی ٹیکوں اور پولیو سےبچاؤ کےپروگرام کی تعریف کرتے ہوئے اس طرز عمل کو ملک بھر میں پھیلانے کی تجویز دے دی۔
وزیراعظم نے بل گیٹس کیساتھ ملکر کام جاری رکھنے کے اپنے عزم کا اعادہ کرتے ہوئے دوبارہ انتخاب پربل گیٹس کے تہنیتی خط پران کاشکریہ ادا کیا۔
اس موقع پر وزیراعظم نے پولیو کے خاتمے کیلئے دیرینہ تعاون پربی ایم جی ایف کا شکریہ ادا کیا اور کہا پاکستان ملک سے پولیو کے خاتمے کے لیے انتھک محنت کر رہا ہے ، پولیو سےپاک پاکستان کےحتمی مقصد کیلئے مسلسل کوششوں کی ضرورت ہے۔
بل گیٹس کا کہنا تھا کہ پولیو کا خاتمہ مستقبل کی نسلوں کومہلک بیماری سے بچانے کیلئےضروری ہے۔
ملاقات میں حفاظتی ٹیکوں،غذائیت ،مالیاتی شمولیت میں سرگرمیوں پربھی تبادلہ خیال کیا گیا ، جس پر شہباز شریف نے کہا کہ گیٹس فاؤنڈیشن پاکستان کی سماجی و اقتصادی ترقی میں قابل اعتماد شراکت دار ہے، گیٹس فاؤنڈیشن آئی ٹی، اسٹیم تعلیم ،ڈیزاسٹر مینجمنٹ سمیت دیگرشعبوں میں تعاون فراہم کرتا ہے۔
وزیر اعظم نے بل گیٹس کو دوبارہ پاکستان کا دورہ کرنے کی دعوت دی۔
