وفاقی حکومت کی جانب سے عید الاضحٰی پر تین چھٹیاں دینے کا فیصلہ کیا گیا ہے جن میں سے ایک چھٹی عید سے پہلے دن کی جبکہ دو چھٹیاں عید کے دو دن ہوں گی،جبکہ عید کے تیسرے دن ملازمین کو واپس ڈیوٹی پر آنا ہوگا۔
وفاقی کابینہ کے اجلاس کے بعد وفاقی وزیر اطلاعات فواد چوہدری نے میڈیا کو بریفنگ دی اور ملک میں کورونا کی صورتحال سے آگاہ کیا۔
وفاقی وزیر نے بتایا کہ ملک میں کورونا کی صورتحال کو دیکھتے ہوئے این سی او سی نے پانچ چھٹیوں کی تجویز دی تھی لیکن کابینہ نے تین چھٹیوں کی منظوری دی ہے۔
انہوں نے کہا کہ وفاقی کابینہ نے عیدالاضحیٰ پر 21،20 اور 22 جولائی کی عام تعطیلات کی منظوری دی ہے۔
چونکہ پاکستان میں عید الاضحٰی 21 جولائی کو ہے اس لیے مجوزہ چھٹیوں کے حساب سے تیسرے روز ملازمین کو واپس ڈیوٹی پر آنا ہوگا۔
واضح رہے سنیچر کو ذی الحجہ کا چاند دیکھنے کے لیے رویت ہلال کمیٹی کا اجلاس کراچی میں منعقد ہوا تھا۔اجلاس کی صدارت کمیٹی کے صدر مولانا عبدالخبیر آزاد نے کی تھی۔
اجلاس کے بعد چاند کی رویت سے متعلق اعلان کرتے ہوئے مولانا عبدالخبیر آزاد نے کہا تھا کہ ملک بھر میں کسی بھی مقام پر چاند نظر آنے کی شہادت موصول نہیں ہوئی اس لیے پاکستان میں عید الاضحٰی 21 جولائی کو ہوگی۔
