انسٹاگرام کے سربراہ ایڈم موسیری نے ایک ٹوئٹ میں اعلان کیا ہے کہ رواں ہفتے سے ڈیجیٹل کلیکشن کی آزمائش امریکا سے تعلق رکھنے والے کچھ کریٹیرز اور کلکٹرز سے شروع ہوگی جو انسٹاگرام پر این ایف ٹیز شیئر کرسکیں گے۔
ان کا کہنا تھا کہ کسی این ایف ٹی کو پوسٹ یا شیئر کرنے پر کوئی فیس نہیں لی جائے گی ۔
این ایف ٹی یا نان فلیجل ٹوکن حالیہ برسوں کے دوران ڈیجیٹل دنیا میں بہت زیادہ مقبول ہوئے ہیں جو بلاک چین میں محفوظ ایسا ڈیجیٹل ڈیٹا ہوتا ہے جو اصل مالک آن لائن فروخت کرتا ہے۔
آسان الفاظ میں یہ ڈیجیٹل فوٹوز، ویڈیوز اور آڈیو فائلز ہوتی ہیں جن کو کسی آرٹ کلیکشن کی طرح فروخت کیا جاتا ہے مگر این ایف ٹیز کو کسی نیلام گھر کی بجائے آن لائن نیلام کیا جاتا ہے۔
میٹا کی جانب سے این ایف ٹیز کی مارکیٹ میں قدم رکھنے کا اعلان کچھ ماہ پہلے کیا گیا تھا اور اب سب سے پہلے انسٹاگرام سے اس کا آغاز ہورہا ہے۔
مارچ 2022 میں ایک خطاب کے دوران میٹا کے سی ای او مارک زکربرگ نے کہا تھا کہ آئندہ چند ماہ کے دوران این ایف ٹیز کو اپنی ایپس میں لائیں گے ۔
این ایف ٹیز ایک کلیکشن کی شکل میں بھی ہوسکتی ہیں یا ایک تصویر یا ویڈیو وغیرہ، جن کی قیمت چند سو سے ہزاروں ڈالرز کی ہوسکتی ہے بلکہ نایاب ہونے کی صورت میں لاکھوں کروڑوں ڈالرز میں بھی فروخت ہوسکتی ہیں۔
