راولپنڈی: بانی پاکستان تحریک انصاف (پی ٹی آئی) عمران خان کی بہن علیمہ خان اور وکلا کے درمیان اڈیالہ جیل کے باہر شدید تکرار ہو گئی۔
تفصیلات کے مطابق، علیمہ خان نے اڈیالہ جیل میں اپنے بھائی اور سابق وزیراعظم عمران خان سے ملاقات کی۔ ملاقات کے بعد جب وہ جیل کے مرکزی داخلی گیٹ پر پہنچیں تو وہاں موجود وکلا کے ساتھ ان کی تلخ کلامی ہوگئی۔
علیمہ خان نے وکلا کو دو ٹوک الفاظ میں کہا کہ "بانی پی ٹی آئی سے وہی ملاقات کرے گا جس کو کوئی ذمہ داری سونپی گئی ہو۔ ہر بندہ صرف ملاقات کے لیے جیل آتا ہے لیکن ہم اپنے بھائی کے لیے جان بھی دے سکتے ہیں۔"
انہوں نے مزید کہا کہ کسی بھی وکیل کو اضافی پٹیشن دائر کرنے کی اجازت نہیں ہوگی۔ "عدالت میں پٹیشن دائر کرنے کا اختیار صرف سلمان اکرم اور سلمان صفدر کے پاس ہے۔"
نعیم پنجوتھہ، جو بشریٰ بی بی کے فوکل پرسن ہیں، نے علیمہ خان کو جواب دیتے ہوئے کہا کہ "میں کسی سے نہیں ملا۔ ہم جیلیں بھگت کر آئے ہیں اور ہم پر پرچے ہوئے ہیں۔"
علیمہ خان نے اس بات پر بھی اعتراض کیا کہ بانی پی ٹی آئی کی بچوں سے ٹیلیفونک بات نہیں کرائی جا رہی۔
