لندن : انگلینڈ کرکٹ ٹیم کے سابق کپتان کیون پیٹرسن نے مطالبہ کیا ہے کہ لمبا چھکا لگانے پر کھلاڑی کو مزید رنز دیئے جائیں، یہ انوکھا مطالبہ انہوں نے انٹرنیشنل کرکٹ کونسل (آئی سی سی) سے کیا ہے۔
سماجی رابطے کی ویب سائٹ ٹوئٹر پر اپنے پیغام میں انہوں نے آئی سی سی کے قانون میں ترمیم کی سفارش کی ہے۔
کیون پیٹرسن کا کہنا ہے کہ میں آئی سی سی کے ٹی ٹوئنٹی کرکٹ کے اصولوں میں ترمیم چاہتا ہوں۔
انہوں نے آئی سی سی کو ٹیگ کرتے ہوئے کہا کہ کرکٹ کے ٹی ٹوئنٹی فارمیٹ میں اگر کوئی کرکٹر 100 میٹر سے لمبا چھکا مارے تو اسے 6 کے بجائے 12 رنز دیے جائیں۔
سابق انگلش کرکٹر کے مطابق ایسا کرنے سے ٹی ٹوئنٹی کرکٹ کا جوش و خروش مزید بڑھے گا، انہوں نے کہا کہ انگلش کرکٹ بورڈ دی ہنڈریڈ لیگ میں بھی یہ تجربہ کرسکتا ہے۔
واضح رہے کہ کیون پیٹرسن سوشل میڈیا سائٹ ٹوئٹر پر اکثر فعال رہتے ہیں اور کرکٹ سے متعلق اظہارِ خیال کرتے دکھائی دیتے ہیں۔
