لاہور: پاکستان میں کرکٹ کی واپسی کے لیے خدمات سرانجام دینے پر ویسٹ انڈیز کے سابق کپتان ڈیرن سیمی کیلئے بھی سِول ایوارڈ کا اعلان کردیا گیا ہے۔
37 سالہ ڈیرن سیمی کو ستارہ پاکستان کے لیے نامزد کیا گیا ہے۔
سول ایوارڈ کی نامزدگی کے بعد چیئرمین پشاور زلمی جاوید آفریدی نے ایک ٹویٹ میں انہیں مبارکباد دی۔
واضح رہے کہ صدر مملکت ڈاکٹر عارف علوی نے 14 اگست 2021ء کو یوم آزادی کے موقع پر حسب روایت اپنے متعلقہ شعبوں میں شاندار کارکردگی اور جرات کا مظاہرہ کرنے والے پاکستانیوں کے ساتھ ساتھ غیر ملکی شہریوں کیلئے پاکستان کے سول ایوارڈز دینے کی منظوری دی ہے۔
یہ 126 ایوارڈز 23 مارچ 2022ء کو یوم پاکستان کے موقع پر دیئے جائیں گے۔
ان میں نشان امتیاز، ہلال پاکستان، ہلال امتیاز، ستارہ پاکستان، ستارہ شجاعت، ستارہ امتیاز، صدارتی ایوارڈ برائے حسن کارکردگی، ستارہ قائداعظم، تمغہ شجاعت، تمغہ امتیاز اور تمغہ قائداعظم شامل ہیں۔
