انٹرنیشنل کرکٹ کونسل (آئی سی سی) کے چیئرمین گریگ بار کلے اور چیف ایگزیکٹیو جیف ایلر ڈائس 2 روزہ دورے پر لاہور پہنچ گئے۔
لاہور کے علامہ اقبال انٹر نیشنل ائیرپورٹ پہنچنے پر چیئرمین آئی سی سی گریک بارکلے اور چیف ایگزیکٹو جیف ایلرڈائس کا پاکستان کرکٹ بورڈ کے سینئر حکام نے استقبال کیا اور پھولوں کے گلدستے پیش کیے۔
آئی سی سی چیئرمین اور چیف ایگزیکٹو کو لاہور ائیرپورٹ سے بلٹ پروف گاڑی میں سخت سیکیورٹی میں ہوٹل منتقل کیا گیا۔
دوپہر پونے 12 بجے وہ قذافی اسٹیڈیم میں پی سی بی مینجمنٹ کمیٹی کے چیئرمین نجم سیٹھی اور دیگر حکام سے ملاقات کریں گے۔
ذرائع کے مطابق پی سی بی وفد سے ملاقات میں رواں سال بھارت میں ہونے والے ورلڈ کپ میں شرکت اور فنانشل ماڈل بارے اپنے تحفظات اٹھائے گا، 2008 کے بعد سے آئی سی سی حکام کا پاکستان کا پہلا دورہ ہے۔
ذرائع کاکہناہے کہ پاکستان آئی سی سی چیئرمین سے بھارت کے ایشیا کپ نہ کھیلنے پر اپنے تحفظات کا اظہار بھی کرے گا۔
