اسلام آباد: آئی سی سی ورلڈ کپ میں قومی ٹیم کی شرکت سے متعلق وزیر اعظم شہبازشریف نے اہم فیصلہ کیا ہے۔
وزیر اعظم شہبازشریف نے بھارت میں ہونے والے کرکٹ ورلڈ کپ میں قومی ٹیم کی شرکت سے متعلق اعلیٰ سطح کمیٹی قائم کرنے کا فیصلہ کیا ہے۔
ذرائع کے مطابق کمیٹی پاکستان ٹیم کے ورلڈ کپ میں شرکت سے متعلق فیصلہ کرے گی، اس کمیٹی کے سربراہ وزیر خارجہ بلاول بھٹو زرداری ہونگے۔
ذرائع کا بتانا ہے کہ کمیٹی کے دیگر اراکان میں وفاقی وزراراناثنااللہ، اعظم نذیر تارڑ، احسان مزاری، مریم اورنگزیب، اسعد محمود، امین الحق، قمر زمان کائرہ اور طارق فاطمی شامل ہیں۔
ذرائع نے بتایا کہ اس کے علاوہ قومی سلامتی کے اداروں کے سربراہان، سیکرٹری خارجہ بھی ہائی پروفائل کمیٹی کا حصہ ہیں، یہ کمیٹی بھارت میں ورلڈکپ سے متعلق تمام امور پر سفارشات مرتب کرے گی۔
ذرائع نے بتایا کہ کمیٹی کی سفارشات کی روشی میں ورلڈکپ میں شرکت کا فیصلہ کیا جائیگا، کمیٹی کے فیصلے کی حتمی سفارشات کی منظوری کیلئے وزیراعظم کو بھجوائی جائیں گی۔
واضح رہے کہ پی سی بی نے قومی ٹیم کی ورلڈکپ میں شرکت حکومتی اجازت سے مشروط کر رکھی ہے، کرکٹ ورلڈ کپ 5 اکتوبر سے بھارت میں شروع ہوگا جبکہ پاک بھارت ٹاکرا 15 اکتوبر کو احمد آباد میں شیڈول ہے۔
