خبر ہے کہ جاپان حکومت پٹرول کی قیمتوں کو 180 ین فی لیٹر سے کم رکھنے کے لئے سال کے آخر تک ایندھن کی سبسڈی میں توسیع کرنے پر غور کر رہی ہے [ایک جاپانی ین کی پاکستانی روپے کے عوض شرح تبادلہ 2.07 روپے ہے]۔
اس مقصد کے لیے حکومت ایک علیحدہ بجٹ پر کام کر رہی ہے کیونکہ وزیر اعظم فومیو کیشیدا نے گزشتہ ہفتے حکمراں جماعت کے عہدیداروں کو ہدایت کی تھی کہ وہ ایندھن کی سبسڈی میں توسیع کے اقدامات پر غور کریں جو جنوری 2022 میں متعارف کرائی گئی تھیں تاکہ زندگی گزارنے کے دباؤ کو کم کرنے میں مدد مل سکے۔
یہ خبر قابل غور کیوں ہے؟ کیونکہ اس سے ظاہر ہوتا ہے کہ کس طرح ایک حکومت مسلسل افراط زر کی وجہ سے پیدا ہونے والے زندگی کی لاگت کے بحران کے درمیان اپنے شہریوں کی حفاظت کر رہی ہے۔ ہر کوئی جانتا ہے کہ ایندھن کی اونچی قیمتیں کس طرح اور کیوں افراط زر کو مزید بڑھاتی ہیں جس کی وجہ نقل و حمل کی لاگت میں اضافہ ہے۔
اسے سمجھنے کے لئے کسی راکٹ سائنس یا کسی بھی معروف غیر ملکی یونیورسٹی سے ڈگری کی ضرورت نہیں ہے۔
تاہم، پاکستان میں لوگوں کے لئے اس سے بھی زیادہ تشویش ہے. پیٹرولیم مصنوعات کی نئی قیمتوں کا اعلان کرنے میں صرف دو دن باقی ہیں اور میڈیا رپورٹس میں پٹرول کی قیمت میں 10 روپے فی لیٹر اور ڈیزل کی قیمت میں 20 روپے فی لیٹر اضافے کی تجویز دی گئی ہے۔
یقینا کچھ سوالات پوچھے جا سکتے ہیں: کیا ہماری حکومت کو بھی جاپان کی طرح کام کرنا چاہیئے؟ کیا محصولات کی وصولی میں اضافے کے لیے ٹیکس بیس بڑھانے میں ناکامی کا اعتراف نہیں کرنا چاہیئے؟ آخر پاکستان کب تک آئی ایم ایف کے پیچھے چھپتا رہے گا؟ کیا عوام پر مزید مہنگائی کا بوجھ ڈالا جا سکتا ہے اُور کیا عوام مزید سہنے کے متحمل ہو سکتے ہیں؟
معاشی تجزیہ کاروں کی رائے یہ ہے کہ عوام پر مزید ٹیکسوں کا بوجھ نہیں ڈالا جا سکتا کیونکہ اُن کی قوت خرید پہلے ہی جواب دے گئی ہے۔
سیاسی طور پر دیکھا جائے تو قیمتوں میں مزید اضافے کے تباہ کن نتائج برآمد ہوں گے کیونکہ عوام پہلے ہی بجلی کے بڑھتے ہوئے بلوں کی وجہ سے مشتعل ہیں۔ پٹرول اور ڈیزل کے معاملے میں قیمتوں میں اضافہ صرف آگ میں ایندھن شامل کرنے والا ہے۔
لیکن سب سے اہم بات یہ ہے کہ لوگوں کو مزید دبانے کی کوئی گنجائش نہیں ہے کیونکہ وہ اب سکڑتی ہوئی قوت خرید کی وجہ سے کھانے پینے کی اشیاء خریدنے کے بارے میں فکرمند ہیں۔ وہ حد تک پہنچ چکے ہیں اور قومی مفاد کے نام پر قیمتوں میں ایک اور اضافے کے خیال کو ہضم نہیں کر پائیں گے۔
اگر حکومت ایندھن کی قیمتوں میں اضافے کا انتخاب کرتی ہے تو اس کے نتائج عوام کی بھاری اکثریت کے لیے خوفناک ہو سکتے ہیں۔ اس سے نقل و حمل کی لاگت اور خوراک کی قیمتوں میں اضافہ کرکے افراط زر میں مزید اضافہ ہوگا۔
آئی ایم ایف اور اندرون ملک غیر ملکی تعلیم یافتہ ماہرین دونوں کہہ رہے ہیں کہ افراط زر پر قابو پانے کے لیے شرح سود بلند رہنی چاہیے۔ نتیجہ کیا ہے؟ ایک مفلوج معیشت جس میں کاروبار اور ملازمت کے مواقع یا اجرت میں اضافے میں کوئی توسیع نہیں ہے۔
اور لوگوں کا ایک گروپ ایندھن کی قیمتوں میں اضافے کے ساتھ ساتھ بجلی اور گیس کے نرخوں کی بھی وکالت کرتا ہے۔ کیا یہ ایک متضاد پالیسی نہیں ہے؟
یہی وجہ ہے کہ لوگ ایک سادہ سا سوال پوچھ رہے ہیں کہ جب پٹرول، ڈیزل، بجلی اور گیس کی قیمتوں میں مذہبی طور پر اضافہ کیا جا رہا ہے تو مہنگائی میں کمی کی توقع کیسے کی جا سکتی ہے؟
