انگلش ٹیم کے سابق کپتان آئن مورگن نے بھارت میں شیڈول ورلڈکپ کیلئے پاکستان کو ممکنہ سرپرائز کا دعویدار قرار دیدیا۔
سابق انگلش کرکٹر اور کمنٹیٹر آئن مورگن نے میگا ایونٹ میں پاکستان کرکٹ ٹیم کی توقعات پر پورا اترنے کی صلاحیت پر اپنے اعتماد کا اظہار کرتے ہوئے کہا کہ ورلڈکپ کے پریشر میں پاکستانی کھلاڑی بہترین کارکردگی کا مظاہرہ کرسکتے ہیں۔
انہوں نے کہا کہ “میرے خیال میں اس سال ہونے والے کرکٹ ورلڈکپ میں جو ٹیم سب کو حیران کر سکتی ہے وہ پاکستان ہوگی”۔
ورلڈکپ کا آغاز آج سے احمد آباد کے نریندر مودی کرکٹ اسٹیڈیم میں ہوگا، جہاں دفاعی چیمپئین انگلینڈ کو نیوزی لینڈ کا چیلنج درپیش ہوگا۔
قومی ٹیم ٹورنامنٹ میں اپنا پہلا میچ 6 اکتوبر کو نیدرلینڈز کے خلاف حیدرآباد کے راجیو گاندھی کرکٹ اسٹیڈیم میں کھیلے گی۔
