الیکشن کمیشن آف پاکستان کا کہنا ہے کہ 7 سینیٹرز عام انتخابات میں اسمبلیوں کے رکن منتخب ہو گئے ہیں۔
یہ بات الیکشن کمیشن نے سینیٹ سیکریٹریٹ کو بھیجے گئے مراسلے میں کہی ہے۔
مراسلے میں الیکشن کمیشن کا کہنا ہے کہ صادق سنجرانی، عبدالغفور حیدری، یوسف رضا گیلانی، سرفراز بگٹی اسمبلی کے رکن منتخب ہو چکے۔
الیکشن کمیشن کا مراسلے میں کہنا ہے کہ نثار کھوڑو، جام مہتاب، پرنس احمد عمر زیب بھی اسمبلی کے رکن منتخب ہو چکے۔
مراسلے میں الیکشن کمیشن نے کہا ہے کہ صادق سنجرانی پی بی 32 چاغی سے رکنِ بلوچستان اسمبلی منتخب ہوئے ہیں۔
الیکشن کمیشن نے مراسلے میں مزید کہا ہے کہ آئین کے مطابق کسی رکنِ سینیٹ کے کسی بھی اسمبلی کا رکن منتخب ہونے پر اس کی سینیٹ کی نشست خالی ہو جائے گی۔
مراسلے میں الیکشن کمیشن آف پاکستان نے یہ بھی کہا ہے کہ سینیٹ سیکریٹریٹ اس حوالے سے پیش رفت کے لیے ضروری اقدامات کرے۔
