احتساب عدالت نے اڈیالہ جیل میں پاکستان تحریک انصاف کے بانی عمران خان اور ان کی اہلیہ بشریٰ بی بی کے خلاف 190 ملین پاؤنڈ کے کیس کا فیصلہ محفوظ کر لیا ہے۔
احتساب عدالت کے جج ناصر جاوید رانا نے اڈیالہ جیل میں اس کیس کی سماعت کی، جس دوران عمران خان اور بشریٰ بی بی کمرہ عدالت میں موجود تھے۔ دونوں کے وکلاء نے حتمی دلائل مکمل کر لیے جبکہ پراسیکیوشن ٹیم نے گزشتہ روز اپنے دلائل مکمل کیے تھے۔
عدالت نے فریقین کے دلائل مکمل ہونے کے بعد فیصلہ محفوظ کر لیا، اور جج ناصر جاوید رانا نے 23 دسمبر کو فیصلہ سنانے کی تاریخ مقرر کی ہے۔
190 ملین پاؤنڈ ریفرنس کا ٹرائل ایک سال کے دوران مکمل ہوا، اور نیب نے اس دوران 35 گواہان کے بیانات ریکارڈ کیے۔ بانی پی ٹی آئی کے وکلاء نے گواہان پر جرح بھی کی۔
اس کیس میں اہم گواہان میں سابق پرنسپل سیکرٹری اعظم خان، سابق وزیراعلیٰ پرویز خٹک اور سابق وفاقی وزیر زبیدہ جلال شامل ہیں، جنہوں نے اپنے بیانات ریکارڈ کرائے۔ 190 ملین پاؤنڈ ریفرنس میں فرد جرم 27 فروری 2023 کو عائد کی گئی تھی۔
