موٹر وے ٹول ٹیکس میں اضافے کیخلاف درخواست پر وفاقی حکومت کو نوٹس

پشاور ہائی کورٹ نے موٹر وے ٹول ٹیکس میں اضافے کے خلاف درخواست پر وفاقی حکومت کو نوٹس جاری کردیا۔

وکیل کے مطابق ایم ٹیگ نہ لگانے والوں کے لیے ٹول ٹیکس میں 100 فیصد اضافہ کیا گیا ہے، حکومت نے 2024 میں دو بار ٹول ٹیکس میں اضافہ کیا، پشاور سے چارسدہ کا ٹول ٹیکس 30 سے 40 اور پھر 40 سے 60 روپے کر دیا، ایک سال میں 50 فیصد اضافہ کیا گیا۔

درخواست میں مزید کہا گیا کہ اب حکومت نے ایم ٹیگ نہ لگانے پر 100 فیصد اضافہ کیا جو غیر قانونی ہے، ٹول ٹیکس میں اضافے سے عوام کو مشکلات کا سامنا ہے۔

جسٹس ایس ایم عتیق شاہ نے ریمارکس دیئے کہ ہمیں بھی پتا ہے کہ یہ اضافی ٹیکس ہے۔

وکیل نے عدالت سے استدعا کی کہ حکم امتناع جاری کیا جائے کہ اس کیس پر فیصلے تک اضافی ٹول ٹیکس نہ لیا جائے جس پر عدالت نے کہا کہ ہم اس میں مناسب آرڈر کرتے ہیں۔

بعد ازاں عدالت نے وفاقی حکومت کو نوٹس جاری کرتے ہوئے کیس کی مزید سماعت ملتوی کردی۔