اسلام آباد: پاکستانی حکام نے عالمی مالیاتی ادارے (آئی ایم ایف) کو بجلی کی قیمت میں کمی پر آمادہ کرلیا ہے۔ پاکستان اور آئی ایم ایف کے درمیان ایک ارب ڈالر کی قسط کے لیے مذاکرات جاری ہیں، اور توانائی شعبے کے حکام نے آئی ایم ایف وفد سے ملاقاتیں کیں۔
ذرائع کے مطابق، پاکستانی حکام نے آئی ایم ایف کو بجلی کا ریٹ 2 روپے فی یونٹ کم کرنے پر راضی کیا ہے۔ بنیادی ٹیرف میں ڈیڑھ سے 2 روپے تک کمی پر بھی بات چیت ہوئی۔
ذرائع کا کہنا ہے کہ بجلی کے ٹیرف میں کمی کا فیصلہ اپریل سے نافذ العمل ہوگا۔ تاہم، تقسیم کار کمپنیوں کی نجکاری کا نیا جامع منصوبہ آئی ایم ایف کو پیش کرنا ہوگا۔
آئی ایم ایف نے بجلی تقسیم کار کمپنیوں کی نجکاری کے موجودہ منصوبے پر عدم اطمینان کا اظہار کیا اور کمپنیوں کے نقصانات پر تشویش ظاہر کی ہے۔ آئی ایم ایف نے کمپنیوں کی کارکردگی کو بہتر بنانے پر زور دیا ہے۔
حکومت نے 3 ڈسکوز کی نجکاری کا پلان آئی ایم ایف کو پیش کیا ہے، جس کے تحت پہلے مرحلے میں آئیسکو، فیسکو اور گیپکو، جبکہ دوسرے مرحلے میں میپکو، لیسکو اور حیسکو کی نجکاری ہوگی۔
