اسلام آباد: ترجمان دفترخارجہ نے پاکستان کے ترکمانستان میں تعینات سفیر کو امریکا میں داخلے سے روکنے کی تصدیق کردی۔ ترجمان دفترخارجہ نے بتایا کہ پاکستان کے ترکمانستان میں تعینات سفیر احسن وگن کو امریکا میں داخلے سے روکنے کی خبر درست ہے۔
ترجمان دفتر خارجہ نے کہا کہ متعلقہ افسر نجی دورے پر امریکا گئے تھے اور اس حوالے سے مزید تحقیقات جاری ہیں۔ ترجمان کے مطابق پاکستانی سفارتکار کی امریکا سے واپسی کا معاملہ وزارت خارجہ دیکھ رہی ہے اور مکمل جانچ پڑتال کی جا رہی ہے، لہٰذا قیاس آرائیوں سے گریز کیا جائے۔
واضح رہے کہ گزشتہ روز سفارتی ذرائع سے یہ خبر سامنے آئی تھی کہ پاکستان کے ترکمانستان میں تعینات سفیر کو امریکا میں داخلے سے روک دیا گیا اور انہیں لاس اینجلس سے واپس بھیج دیا گیا۔
