اسلام آباد: آئی ایم ایف نے بین الاقوامی سرمایہ کاری منصوبوں پر ٹیکس استثنا کا مطالبہ مسترد کردیا۔
ذرائع کے مطابق بین الاقوامی مالیاتی فنڈ (آئی ایم ایف) نے اسپیشل انویسٹمنٹ فیسلٹی کونسل (ایس آئی ایف سی) کی جانب سے بین الاقوامی سرمایہ کاری منصوبوں پر ٹیکس استثنا کی درخواست رد کردی۔ آئی ایم ایف کو ایس آئی ایف سی کے کام پر بریفنگ دی گئی، جہاں ایس آئی ایف سی حکام نے وفد کو سرمایہ کاری، گورننس اور اسٹرکچر پر بریفنگ دی۔
اس موقع پر پاکستانی حکام نے چاغی سے گوادر تک ریلوے ٹریک کے منصوبے پر ٹیکس استثنا کی درخواست کی۔ ذرائع کے مطابق ریکوڈک سے نکلنے والی معدنیات کی گوادر تک ٹرانسپورٹ کے لیے ریلوے ٹریک کی ضرورت ہے اور اس منصوبے کے لیے نئی لائن تعمیر کی جائے گی۔
چاغی-گوادر ریل منصوبے پر وزارتِ خزانہ، وزارتِ ریلوے اور ایس آئی ایف سی نے فزیبیلٹی اسٹڈی کی۔ بریفنگ میں بتایا گیا کہ سرمایہ کار ممالک اس منصوبے میں سرمایہ کاری پر ریاستی گارنٹی مانگ رہے ہیں، لیکن قرض پروگرام میں رہتے ہوئے حکومت پاکستان ہر سرمایہ کاری پر ریاستی گارنٹی فراہم نہیں کر سکتی۔
