وفاقی حکومت نے کرپٹو کرنسی کے شعبے میں مؤثر پالیسی سازی اور محفوظ مالیاتی نظام کے قیام کے لیے وزیر خزانہ محمد اورنگزیب کی سربراہی میں پاکستان کرپٹو کونسل قائم کر دی ہے۔
وزارت خزانہ کے جاری کردہ بیان کے مطابق، وزیر خزانہ پاکستان کرپٹو کونسل کے سربراہ ہوں گے، جبکہ ان کے چیف ایڈوائزر بلال بن ثاقب کونسل کے سی ای او کے طور پر خدمات انجام دیں گے۔ بلال بن ثاقب بلاک چین ٹیکنالوجی اور ڈیجیٹل جدت کے میدان میں اپنی مہارت کے باعث اس کونسل کی قیادت کریں گے۔
کونسل کے بورڈ میں گورنر اسٹیٹ بینک آف پاکستان، چیئرمین سیکیورٹیز اینڈ ایکسچینج کمیشن آف پاکستان (ایس ای سی پی)، وفاقی سیکریٹری قانون اور وفاقی سیکریٹری شامل ہوں گے۔ کونسل کا بنیادی مقصد کرپٹو کرنسی کو اپنانے کے لیے مؤثر ضابطے تیار کرنا اور عالمی بلاک چین تنظیموں کے ساتھ روابط استوار کرنا ہے۔
کونسل مالیاتی ٹیکنالوجی، اسٹارٹ اپس، سرمایہ کاروں اور بلاک چین ڈیولپرز کے ساتھ مل کر جدیدیت کو فروغ دینے کے لیے بھی کام کرے گی۔ مزید برآں، صارفین کے تحفظ اور مالیاتی سلامتی کے لیے قانونی اور تعمیلی فریم ورک تیار کیا جائے گا۔
وزارت خزانہ نے کہا ہے کہ کرپٹو کونسل کا قیام ملک میں مالیاتی اور تکنیکی ترقی کی نئی راہیں کھولے گا اور بلاک چین ٹیکنالوجی کے فروغ میں اہم سنگ میل ثابت ہوگا۔
