اسلام آباد: محکمہ موسمیات نے پاکستان میں شوال کے چاند کی رویت سے متعلق پیشگوئی کرتے ہوئے کہا ہے کہ ملک میں عیدالفطر 31 مارچ بروز پیر کو ہونے کا امکان ہے۔
محکمہ موسمیات کے مطابق شوال کے چاند کی پیدائش 29 مارچ کو 3 بج کر 58 منٹ پر ہوگی، جبکہ 30 مارچ کی شام چاند کی عمر تقریباً 27 گھنٹے ہوگی، جو رویت ہلال کے لیے موزوں تصور کی جاتی ہے۔
چاند نظر آنے کے امکانات
محکمہ موسمیات کے مطابق 20 گھنٹے کی عمر کا چاند عام آنکھ سے باآسانی دیکھا جا سکتا ہے، جبکہ 16 سے 18 گھنٹے عمر والا چاند دوربین کی مدد سے نظر آتا ہے۔ اس لحاظ سے 30 مارچ کو چاند نظر آنے کا قوی امکان ہے۔
حکومت کا عید کی چھٹیوں کا اعلان
وفاقی حکومت نے 31 مارچ سے 2 اپریل تک عیدالفطر کی تین تعطیلات دینے کا اعلان کر دیا ہے، جس کا نوٹیفکیشن کابینہ ڈویژن نے جاری کر دیا ہے۔ تاہم، صوبائی حکومتوں کی جانب سے ابھی فیصلے کا انتظار ہے۔
عید کی تیاریوں کا آغاز
چاند نظر آنے کی پیشگوئی کے بعد بازاروں میں رش بڑھنے لگا ہے، جبکہ عوام خریداری کے لیے مارکیٹوں کا رخ کر رہے ہیں۔ عید کی تیاریوں کے ساتھ ساتھ لوگ سرکاری اعلان کا بھی انتظار کر رہے ہیں۔
