اسٹیٹ بینک آف پاکستان کی مانیٹری پالیسی کمیٹی نے پالیسی ریٹ کو 12 فیصد پر برقرار رکھنے کا فیصلہ کیا، جس کے بعد قومی بچت اسکیموں کی منافع کی شرح میں معمولی ردوبدل کیا گیا ہے۔
سینٹرل ڈائریکٹوریٹ آف نیشنل سیونگز کے مطابق، شارٹ ٹرم سیونگ سرٹیفکیٹ کی شرح 15 بیسز پوائنٹس کے اضافے سے 10.81 فیصد سے بڑھ کر 10.96 فیصد ہوگئی، جبکہ ڈیفنس سیونگ سرٹیفکیٹس پر منافع کی شرح ایک بیسز پوائنٹ اضافے کے ساتھ 12.15 فیصد کردی گئی ہے۔
اسی طرح، پنشنر بینیفٹ اکاؤنٹ، بہبود سیونگ سرٹیفکیٹ اور شہداء فیملی ویلفیئر اکاؤنٹ پر منافع کی شرح 10 بی پی ایس اضافے کے بعد 13.68 فیصد کردی گئی ہے۔
سروا اسلامک ٹرم اکاؤنٹ اور سروا اسلامک سیونگ اکاؤنٹ کی منافع کی شرح 70 بیسز پوائنٹس کے اضافے کے بعد 9.74 فیصد سے بڑھ کر 10.44 فیصد پر پہنچ گئی۔
تاہم، سیونگ اکاؤنٹ کے ریٹرن میں 100 بی پی ایس کی کمی کر دی گئی، جس کے بعد یہ 11.5 فیصد سے کم ہو کر 10.5 فیصد پر آگیا ہے۔
منافع کی ان نئی شرحوں کا اطلاق فوری طور پر ہوگا۔
