اسلام آباد: انسداد دہشت گردی عدالت نے سابق خاتون اول بشریٰ بی بی کی 26 نومبر ڈی چوک احتجاج کیس میں عبوری ضمانت میں 5 مئی تک توسیع کر دی۔
کیس کی سماعت انسداد دہشت گردی عدالت کے جج طاہر عباس سپرا نے کی، جہاں بشریٰ بی بی کے وکلاء انصر کیانی اور شمس کیانی پیش ہوئے۔ وکیل صفائی نے مؤقف اختیار کیا کہ بشریٰ بی بی کو تاحال پولیس نے شامل تفتیش نہیں کیا۔
جج طاہر عباس سپرا نے تفتیشی افسر کو ہدایت کی کہ آج ہی بشریٰ بی بی کو جیل میں شامل تفتیش کیا جائے۔
بشریٰ بی بی کے خلاف دہشت گردی کی دفعات کے تحت تھانہ کوہسار میں مقدمہ درج ہے، جبکہ عدالت نے ان کی حاضری سے استثنیٰ کی درخواست بھی منظور کر لی۔
