لاپتہ صحافی وحید مراد کی بازیابی کے لیے ان کی ساس عابدہ نواز کی جانب سے اسلام آباد ہائیکورٹ میں درخواست دائر کر دی گئی ہے۔
درخواست ایڈوکیٹ ایمان مزاری اور ہادی علی چٹھہ نے دائر کی، جس میں سیکرٹری داخلہ، دفاع، آئی جی اسلام آباد اور ایس ایچ او کراچی کمپنی کو فریق بنایا گیا ہے۔
دائر درخواست میں کہا گیا ہے کہ رات دو بجے کالی وردی میں ملبوس افراد ہمارے گھر آئے، جن کے ساتھ دو پولیس کی گاڑیاں بھی تھیں۔ ان افراد نے وحید مراد کو زبردستی اٹھالیا، اور میرے ساتھ بھی بدتمیزی کی۔
درخواست گزار نے مؤقف اپنایا کہ کراچی کمپنی تھانے میں درخواست دینے کے باوجود مقدمہ درج نہیں کیا گیا۔
درخواست گزار نے استدعا کی ہے کہ اسلام آباد ہائیکورٹ وحید مراد کی فوری بازیابی کا حکم دے اور غیر قانونی طور پر اٹھانے والوں کے خلاف کارروائی کرنے کی ہدایت دے۔
