نیشنل ڈیزاسٹر مینجمنٹ اتھارٹی (این ڈی ایم اے) نے موسم گرما کے حوالے سے ممکنہ موسمی صورتحال کی رپورٹ جاری کر دی ہے، جس میں ملک بھر میں شدید گرمی، کم بارشوں اور ممکنہ موسمی خطرات سے خبردار کیا گیا ہے۔
رپورٹ کے مطابق آئندہ مہینوں میں درجہ حرارت معمول سے زیادہ جبکہ بارشوں کی مقدار معمول سے کم رہنے کا امکان ہے، جو کہ جنوبی پنجاب، سندھ اور بلوچستان میں ہیٹ ویو کا سبب بن سکتی ہے۔ ان علاقوں میں درجہ حرارت 45 ڈگری سینٹی گریڈ تک جا سکتا ہے۔
این ڈی ایم اے نے خبردار کیا ہے کہ کراچی، بدین، لاڑکانہ، عمر کوٹ، تھرپارکر، مٹیاری اور سکھر سمیت سندھ کے کئی اضلاع شدید گرمی کی لپیٹ میں رہیں گے۔ جبکہ شکارپور، دادو، سانگھڑ، بہاولپور، رحیم یار خان اور لاہور میں بھی گرمی کی شدت برقرار رہے گی۔
رپورٹ میں مزید کہا گیا ہے کہ بلوچستان کے پہاڑی علاقوں میں گرمی کی شدت آتشزدگی کا سبب بن سکتی ہے، جبکہ بارشوں میں کمی کے باعث فصلوں کی پیداوار متاثر ہونے اور پانی کی قلت پیدا ہونے کا خدشہ ہے۔
مزید برآں، مئی اور جون کے مہینوں میں بحیرہ عرب میں طوفانی صورتحال بھی پیدا ہو سکتی ہے، جس کے لیے پیشگی اقدامات کی ضرورت ہے۔
