درگاہ میں ایس او پیز کی سختی سے پابندی کروائی جائے گی۔
ذرائع کے مطابق سیہون شریف میں حضرت لعل شہباز قلندر کے مزار کو ایس او پیز کے تحت زائرین کے لیے کھول دیا گیا ہے۔ اس موقع پر 80 سے زائد پولیس اہلکاروں کو تعینات کیا گیا ہے۔
درگاہ میں بغیر ماسک کسی کو داخلے کی اجازت نہیں ہوگی،ہر 8 گھنٹے بعد درگاہ کو دھویا جائے گا جبکہ وہاں میڈیکل کیمپ بھی قائم کردیا گیا ہے۔
درگاہ کے داخلی دروازے پر 6 واک تھرو سینی ٹائزر گیٹ بھی نصب کردیے گئے ہیں، علاوہ ازیں دھمال میں صرف 25 افراد شریک ہو سکیں گے۔
خیال رہے کہ مارچ میں پاکستان میں کرونا وائرس کے پھیلاؤ کے باعث ملک بھر کی تمام درگاہوں بشمول درگاہ حضرت لعل شہباز قلندر کو بند کردیا گیا تھا۔
کرونا وائرس کی وجہ سے رواں برس حضرت لعل شہباز قلندر کا عرس بھی ملتوی کردیا گیا تھا جو ہر سال 18، 19 اور 20 شعبان کو منعقد کیا جاتا ہے۔
چیف سیکریٹری سندھ کے مطابق سنہ 2019 میں لعل شہباز قلندر کے عرس کے موقع پر 25 لاکھ سے زائد زائرین نے شرکت کی تھی۔اس بار بھی بڑی تعداد میں زائرین کی آمد کی توقع ہے اور اسی وجہ سے ہم نے پہلے ہی سے پوری تیاری کر رکھی ہے۔
