وفاقی وزیر اطلاعات و نشریات سینیٹر شبلی فراز کا کہنا ہے کہ حکومت کے خلاف تحریک چلانے والوں کے اپنے خلاف تحریک چل پڑی ہے، مولانا شیرانی اور حافظ حسین احمد کا بیان اس کی واضح گواہی ہے۔
سماجی رابطے کی ویب سائٹ ٹویٹر پر وفاقی وزیر کا کہنا تھا کہ ذاتی مفاد کو فوقیت دینے والوں کو رسوائی کے سوا کچھ نہیں ملے گا، منتشرالخیال اپوزیشن کی انتشاری سیاست میں ملک اور عوام کا بھلا نہیں، اللہ تعالی اپوزیشن کو توفیق دے کہ اسے کرسی کی بجائے عوام اور ان کے مسائل نظر آنا شروع ہو جائیں۔
اپنی ٹوئٹ میں شبلی فراز نے کہا کہ پی ڈی ایم میں شامل مفاد پرست ٹولے کی سمتیں مختلف اورمنزلیں جدا ہیں۔ یہ سانجھ کی ہنڈیا اب بیچ چوراہے پھوٹ رہی ہے، حکومت کے خلاف تحریک چلانے والوں کے اپنے خلاف تحریک چل پڑی ہے۔ مولانا شیرانی اور حافظ حسین احمد کا بیان اس کی واضح گواہی ہے۔
