اسلام آباد:کابینہ ڈویژن نے براڈ شیٹ کیس کی تحقیقات کے لیے جسٹس (ر) عظمت سعید پر مشتمل ایک رکنی کمیشن کا نوٹیفکیشن جاری کردیا۔
ذرائع کے مطابق وزیراعظم عمران خان کی ہدایت پر کابینہ ڈویژن نے جسٹس (ر) عظمت سعید پر مشتمل ایک رکنی کمیشن کا نوٹیفکیشن جاری کردیا ہے۔ نوٹیفکیشن کے ساتھ ٹی او آرز بھی جاری کردیے گئے ہیں۔
نوٹیفکیشن کے مطابق کمیشن کوتحقیقات کے لیے افسران اور ماہرین پرمشتمل کمیٹیاں بنانے کا اختیار ہوگا، کمیشن براڈشیٹ اور آئی اے آر کے انتخاب، تقرری اورمعاہدوں کی چھان بین کرے گا۔
نوٹیفکیشن میں مزید کہا گیا کہ جسٹس (ر) عظمت سعید پر مشتمل کمیشن 2003 میں براڈشیٹ اور انٹرنیشنل ایسٹ ریکوری فرمز سے معاہدوں کی منسوخی کی وجوہات کی جانچ کرے گا اور ساتھ ہی 2008 میں براڈ شیٹ کوپاکستان کی ادائیگیوں کی وجوہات اور اثرات کی نشاندہی بھی کرے گا۔
واضح رہے مسلم لیگ (ن) کی جانب سے جسٹس (ر) عظمت سعید کی تعیناتی کی مخالفت کرتے ہوئے شدید احتجاج کیا تھا۔
