سندھ کورونا ٹاسک فورس کے اجلاس میں فیصلہ کیا گیا ہے پیر سے دکانیں رات 8 بجے تک کھلی رکھنے کی اجازت ہوگی۔
تاہم وزیراعلیٰ سندھ نے تنبیہہ کی ہے کہ تمام دکانوں کے عملے کو ویکسینیشن کروانا لازمی ہوگی اور 15 روز بعد ان سب کے ویکسینیشن سرٹیفکیٹس چیک کیے جائیں گے۔
صوبائی ٹاسک فورس کا اجلاس وزیراعلیٰ سندھ مراد علی شاہ کی سربراہی میں ہوا جس میں رات 12 بجے تک آؤٹ ڈور ڈائننگ کھلی رکھنے کی اجازت بھی دے دی گئی تاہم آؤٹ ڈور ڈائننگ میں لوگوں کے درمیان فاصلہ رکھنا لازمی ہوگا۔
علاوہ ازیں صوبائی حکومت نے ساحل سمندر/سی ویو کھولنے اور ایس او پیز پر عملدرآمد کے ساتھ سیلونز کو بھی 8 بجے تک کھولنے کی اجازت دینے کا فیصلہ کیا گیا۔
وزیراعلیٰ سندھ مراد علی شاہ نے اعلان کیا کہ 2 ہفتوں بعد صوبےمیں شادی ہالز کھولنے اور آؤٹ ڈور شادیوں کی اجازت ہوگی۔
صوبائی مشیر قانون مرتضیٰ وہاب نے ٹاسک فورس کے فیصلوں کی تفصیلات سے آگاہ کرتے ہوئے بتایا کہ ریسٹورنٹس کے لیے ڈائننگ آؤٹ کی اجازت ہوگی جبکہ ریسٹورنٹس کے اندر بیٹھ کر کھانے پر پابندی برقرار رہے گی۔ساتھ ہی انہوں نے ایس او پیز پر عملدرآمد کرنے اور ماسک پہننے کی اپیل بھی کی۔
علاوہ ازیں صوبائی ٹاسک فورس نے فیصلہ کیا کہ سندھ اسٹینڈرڈ آپریٹنگ پروسیجرز (ایس او پیز) پر سختی سے عملدرآمد کے ساتھ 7 جون سے نویں سے بڑی جماعتوں کے لیے تعلیمی ادارے کھول دیے جائیں گے۔
اس بارے میں ایک ٹوئٹر پیغام میں تفصیلات بتاتے ہوئے وزیر تعلیم سندھ سعید غنی نے کہا کہ اسکول کے عملے کے لیے ویکسین لگوانا لازمی ہوگی اور تعلیمی ادارے طلبہ کی 50 فیصد حاضری کے ساتھ کھولے جائیں گے۔
ٹاسک فورس کے اجلاس میں بتایا گیا کہ 5 جون کو کراچی میں کیسز کے مثبت آنے کی شرح 8.5 فیصد تھی جبکہ یکم جون کو یہ شرح 12.45 فیصد تھی۔
اسی طرح 5 جون کو صوبے کے دوسرے بڑے شہر حیدرآباد میں 11.06 فیصد کیسز مثبت آئے۔
اجلاس کو بتایا گیا کہ اس وقت کراچی میں 79 مریض وینٹی لیٹرز پر ہیں۔
وزیراعلیٰ سندھ نے صوبائی محکمہ صحت کو آئندہ 3 ماہ کے عرصے میں ایک کروڑ 80 لاکھ افراد کو ویکسین لگانے کا ہدف دیا۔
صوبائی ٹاسک فورس کے اجلاس میں صوبائی وزرا ڈاکٹر عذرا فضل پیچوہو ، سعید غنی، ناصر شاہ، جام اکرام، مرتضیٰ وہاب ، قاسم سراج سومرو، چیف سیکریٹری ممتاز شاہ، آئی جی پولیس مشتا ق مہر، اے سی ایس ہوم عثمان چاچڑ ، ایڈیشنل آئی جی کراچی عمران یعقوب ، وزیراعلیٰ سندھ کے پرنسپل سیکریٹری ساجد جمال ابڑو، صوبائی سیکریٹریز ، احمد بخش ناریجو، ریاض الدین ناریجو، ڈاکٹر باری ، ڈاکٹر فیصل ، ڈبلیو ایچ او کی ڈاکٹر سارا، ڈاکٹر قیصر سجاد، ڈبلیو ایچ او اور رینجرز کے نمائندوں نے شرکت کی۔
