غزہ میں زخمیوں سے بھرے اسپتال پر بمباری کے بعد اسرائیل نے القدس اسپتال تباہ کرنے کی دھمکی بھی دے دی۔
عالمی ادارہ صحت کے سربراہ ٹیڈروس ادہانوم نے اسرائیلی دھمکی پر تشویش کا اظہار کرتے ہوئے کہا ہے کہ القدس اسپتال خالی کرنے کی دھمکی پریشان کن ہے۔
انہوں نے کہا کہ مریضوں سے بھرے اسپتال کو محفوظ طریقے سے خالی کرنا ممکن نہیں۔
ڈبلیو ایچ او کے سربراہ نے مطالبہ کیا ہے کہ عام شہریوں اور مریضوں کے تحفظ کو ہر قیمت پر یقینی بنایا جائے۔
دوسری جانب فلسطینی وزیر صحت مائی الکائیلہ نے عالمی برادری اور انسانی حقوق کی تمام بین الاقوامی تنظیموں سے فوری طور پر اپیل کی ہے کہ وہ القدس اسپتال کو اسرائیلی قابض حکام کی جانب سے بمباری کے خطرے سے بچائیں۔
واضح رہے کہ غزہ میں اس ہفتے کے شروع میں الاہلی بیپٹسٹ اسپتال پر اسرائیلی فضائی حملے میں کم از کم 500 افراد شہید ہوئے تھے ۔
