قومی ٹیم کے بیٹر فخر زمان کا کہنا ہے کہ دوسرے ٹی ٹوئنٹی میں آئرلینڈ کا 200 رنز کا ہدف نارمل طریقے سے مکمل نہیں ہونا تھا اس لیے میں نے اور رضوان نے فیصلہ کیا کہ ہم اٹیک کریں گے۔
فخر زمان کا کہنا تھا کہ ہم خوش قسمت رہے اور ہمیں کامیابی بھی ملی، ٹاپ آرڈر کے دو بیٹرز آؤٹ ہوجائیں تو دباؤ تو ہوتا ہے، جب آپ اپنے اٹیک کے پلان پر جاتے ہیں تو دباؤ ختم ہوجاتا ہے۔
فخر زمان نے کہا کہ محمد رضوان نے جس طرح کھیلا ان کو مکمل کریڈٹ جاتا ہے، محمد رضوان کی وجہ سے میرے لیے بھی کھیلنا آسان ہوگیا تھا، ہدف کے تعاقب میں جب آپ 70 سے 80 رنز کرتے ہیں تویہ اچھی اننگز ہوتی ہے۔
یاد رہے پاکستان اور آئرلینڈ کے درمیان ہونے والے دوسرے ٹی ٹوئنٹی میچ میں پاکستان نے آئرلینڈ کو 7 وکٹ سے شکست دی تھی۔
پاکستان کی جانب سے محمد رضوان نے 46 گیندوں پر 75 جب کہ فخر زمان نے 40 گیندوں پر 78 رنز کی شاندار اننگز کھیلی۔
