قصور: وزیراعلی پنجاب مریم نواز نے کہا ہے کہ کسانوں کے لیے 4 ماہ میں 400 ارب روپے کا پیکج دیں گے۔
پھول نگر میں عوامی اجتماع سے خطاب کرتے ہوئے انہوں نے کہا کہ گندم خریدنے سے جو کرپشن کے انبار لگتے تھے وہ راستہ بند کردیا، گندم کا کوئی بحران نہیں ہے۔
انہوں نے کہا کہ عوام کے لیے روٹی سستی کرنے کے لیے کھڑی ہوں، کسان کارڈ سے کسان کھاد اور بیج خرید سکیں گے۔ مریم نواز نے کہا کہ عوام کو علاج کے لیے کسی اور شہر جانے کی ضرورت نہیں پڑے گی۔
وزیراعلیٰ پنجاب نے کہا کہ ہم نے کنٹینر میں فیلڈ اسپتال بناکر پورے پنجاب میں بھیج دیئے، چند ماہ میں پنجاب کے اسپتالوں کو تبدیل کرکے رکھ دیں گے، صبح سے رات تک صحت اور تعلیم کے منصوبے بناتی ہوں۔
علاوہ ازیں انہوں نے کہا کہ سازش کرکے نواز شریف کی حکومت ختم کردی جاتی ہے، نواز شریف کی حکومت ختم کرنے سے ترقی رک جاتی ہے، سیاسی بنیادوں پر پولیس کی پوسٹنگ ہوگی تو پولیس پرفارم نہیں کرے گی۔
