آئندہ مالی سال کے بجٹ میں سرکاری ملازمین کی تنخواہوں میں اضافے کے لیے مختلف تجاویز سامنے آگئیں۔ پہلی تجویز کے مطابق تنخواہ اور پنشن میں 10 سے 15 فیصد تک جبکہ دوسری تجویز میں چھوٹے ملازمین کو 15 سے 20 فیصد تک ریلیف دینے کی ہے۔
وزارت خزانہ کے ذرائع کے مطابق گریڈ ایک سے سولہ تک کے سرکاری ملازمین کی تنخواہ میں 20 فیصد اضافے کی بھی تجویز ہے۔ گریڈ 17 سے 22 تک کے افسران کی تنخواہ میں 15 فیصد جبکہ گریڈ ایک سے 16 کے ریٹائرڈ سرکاری ملازمین کی پنشن میں 20 فیصد اضافے کی تجویز ہے۔
گریڈ 17 سے 22 تک کے ریٹائرڈ ملازمین کی پنشن میں 20 فیصد اضافے پر غور کیا جارہا ہے۔ تنخواہ اور پنشن میں اضافے کی حتمی منظوری وفاقی کابینہ کے اجلاس میں دی جائے گی۔ سرکاری ملازمین کی ریٹائرمنٹ کی عمر 62 سال کرنے کی بھی تجویز زیر غور ہے۔ تجویز کا اطلاق صوبائی حکومتوں کی مشاورت سے کیا جائے گا۔
وفاقی کابینہ سے منظوری کے بعد معاملہ غور کیلئے مشترکہ مفادات کونسل کو بھیجا جائے گا۔ صوبائی حکومتوں کی منظوری کی صورت میں اس کا اطلاق آئندہ مالی سال سے کیا جائے گا۔
