اقوام متحدہ کے سیکریٹری جنرل انتونیو گوتریس کا کہنا ہے فلسطینیوں کو غزہ سے نکالنا نسل کشی کے مترادف ہوگا۔
عرب ٹی وی کو انٹرویو میں اقوام متحدہ کے سیکریٹری جنرل انتونیو گوتریس نے کہا کہ فلسطینیوں کو نکالنے سے دو ریاستی حل ناکام ہوگا۔
ان کا کہنا تھا کہ جنگ بندی جاری رہنی چاہیے۔ غزہ کی پٹی کی تعمیر نو کے اخراجات کا تخمینہ لگانا انتہائی مشکل ہے، سب سے اہم ٹاسک رفح سرحدی گزرگاہ کو دوبارہ کھولنا ہے۔
ادھر قطر میں میڈیا سے گفتگو کرتے ہوئے حماس کے رہنما باسم نعیم کا کہنا ہے حماس منزل کے حصول کے لیے صدر ٹرمپ سمیت کسی بھی رہنما سے ملاقات کے لیے تیار ہے۔ باسم نعیم نے کہا کہ سیاست میں پسند اور ناپسند کی بنیاد پر فیصلوں سے تمام فریقین کو نقصان ہوتا ہے۔
دوسری جانب اسرائیل کا مقبوضہ مغربی کنارے میں فلسطینیوں کے خلاف آپریشن جاری ہے۔ نصیرات پناہ گزین کیمپ پر حملے میں ایک فلسطینی ماہی گیر شہید ہوگیا۔ جنین کیمپ میں اسرائیلی فوج نے کارروائی کے دوران دو فلسطینیوں کو شہید کردیا۔
خیال رہے کہ 7 اکتوبر 2023 سے شہدا کی مجموعی تعداد 47 ہزار 460 تک پہنچ چکی ہے جبکہ ایک لاکھ 11 ہزار زخمی ہوچکے ہیں۔
