چین کی ٹیلی کام کمپنی ہواوے نے اسپیشل انویسٹمنٹ فیسلیٹیشن کونسل (ایس آئی ایف سی) کے تعاون سے 3 لاکھ پاکستانیوں کو آئی ٹی کی تربیت فراہم کرنے کا اعلان کیا ہے۔ اس پروگرام کے تحت 60 ہزار افراد کو جدید آئی ٹی مہارتیں سکھائی جائیں گی، جبکہ 2 لاکھ 40 ہزار شرکا کو بنیادی تربیت دی جائے گی۔
یہ اقدام پاکستان کے ڈیجیٹل انفراسٹرکچر کو مضبوط بنانے، آئی ٹی برآمدات میں اضافہ کرنے، اور نئے روزگار کے مواقع پیدا کرنے میں اہم کردار ادا کرے گا۔ حکومت نوجوانوں کو جدید تکنیکی مہارتوں سے لیس کرنے پر خاص توجہ دے رہی ہے، اور اس سلسلے میں ہواوے اور ہائر ایجوکیشن کمیشن (ایچ ای سی) کے تعاون سے 15 جامعات میں جدید آئی ٹی کورسز شروع کیے جائیں گے۔
ایس آئی ایف سی نہ صرف ٹیلی کام کے شعبے میں سرمایہ کاری کر رہی ہے بلکہ ملک کی ڈیجیٹل ترقی کو بھی فروغ دینے میں اہم کردار ادا کر رہی ہے۔ ماہرین کا کہنا ہے کہ یہ منصوبہ پاکستانی معیشت کو عالمی ڈیجیٹل مارکیٹ میں ایک نمایاں مقام دلانے کے لیے ایک اہم سنگ میل ثابت ہوگا۔
