صدر انجمن تاجران اجمل بلوچ نے وفاقی حکومت سے مطالبہ کیا ہے کہ سولر پالیسیوں پر نظرثانی کی جائے اور سولر صارفین سے بجلی کی خریداری میں رعایت دی جائے۔ اجمل بلوچ کا کہنا تھا کہ سولر صارفین سے بجلی خریداری کی قیمت 27 روپے سے 10 روپے کرنا ظلم ہے، اور اس پر فوری طور پر نظرثانی کی جائے۔
انہوں نے مزید کہا کہ سولر پر عائد 18 فیصد سیل ٹیکس واپس لیا جائے اور بجلی کی قیمتوں میں واضح کمی کی جائے تاکہ عوام اور تاجر برادری کو فائدہ ہو سکے۔
اجمل بلوچ نے ملک کی بڑھتی ہوئی مہنگائی پر بھی تشویش کا اظہار کیا اور کہا کہ وزیروں اور مشیروں کی تنخواہوں میں اضافے سے ایسا لگتا ہے کہ ملک پر قرضوں کا کوئی بوجھ نہیں۔
انہوں نے کہا کہ مہنگائی کی وجہ سے خرید و فروخت میں کمی آ رہی ہے اور تاجر برادری انتہائی مشکلات کا شکار ہے۔
انہوں نے مزید کہا کہ خریداری میں کمی کے سبب ڈیمانڈ بھی کم ہو رہی ہے، جس سے کسان اور صنعتکار کو نقصان ہو رہا ہے۔ اجمل بلوچ نے کہا کہ مہنگائی کی وجہ سے عوام کا جینا دوبھر ہوگیا ہے اور مفت بجلی کے سبب 700 ارب روپے کا نقصان ہو رہا ہے۔
آخر میں انہوں نے حکومت سے درخواست کی کہ وہ اپنے اخراجات میں کمی کرے تاکہ ملکی مالی حالات بہتر ہو سکیں۔
