سندھ ہائی کورٹ نے کینالز کی تعمیر کے لیے ارسا کے پانی کی دستیابی کے سرٹیفکیٹ کے خلاف ایک حکم امتناع جاری کر دیا ہے۔ عدالت نے وفاقی حکومت سے 18 اپریل تک تفصیلی جواب طلب کیا ہے۔
پیپلز پارٹی کے سینیٹر بیرسٹر ضمیر گھمرو نے کہا کہ سندھ ہائی کورٹ کے اس حکم کے بعد نہروں کی تعمیر اب ممکن نہیں رہی۔ انہوں نے الزام لگایا کہ سندھ پر زبردستی نہروں کو مسلط کیا جا رہا ہے، جس کے خلاف عوام احتجاج کر رہے ہیں۔ ان کا کہنا تھا کہ ارسا میں سندھ کے نمائندے کی تقرری غیر قانونی طور پر پنجاب سے کی گئی، جس پر عدالت نے نوٹس جاری کیا ہے۔
وزیر آبپاشی سندھ جام خان شورو نے اس عدالتی فیصلے کو تاریخ ساز قرار دیا اور کہا کہ سندھ حکومت نے ارسا میں سندھ کے نمائندے کی تقرری اور متنازع کینالز منصوبے کو ختم کرنے کا مطالبہ کیا ہے۔
