اسلام آباد (مانیٹرنگ ڈیسک):
گزشتہ رات سے لے کر آج صبح تک، پاکستانی ایئر ڈیفنس نے بھارت کے کم از کم چار غیر مسلح جاسوس ڈرونز کو کامیابی سے تباہ کر دیا یا انہیں الیکٹرانک طور پر ناکارہ بنا دیا۔ یہ ڈرونز لاہور، گجرات، گوجرانوالہ، اور چکوال کے علاقوں میں پرواز کر رہے تھے، جہاں انہیں فوری طور پر نشانہ بنایا گیا۔
سیکیورٹی ذرائع کے مطابق، ان ڈرونز کا مقصد پاکستانی حدود میں حساس تنصیبات اور عسکری سرگرمیوں کی جاسوسی کرنا تھا، لیکن پاکستان کی جدید الیکٹرانک وارفیئر اور ایئر ڈیفنس سسٹمز نے انہیں بروقت نشانہ بنا لیا۔
ذرائع نے بتایا کہ ان ڈرونز کی شناخت بھارتی ساختہ غیر مسلح ری کنیسنس UAVs کے طور پر ہوئی ہے، اور تمام ملبہ پاکستان کے مختلف مقامات پر قبضے میں لے لیا گیا ہے، جس سے بھارت کی جانب سے خلاف ورزی کی تصدیق ہو گئی ہے۔
پاکستانی حکام نے بھارت کو خبردار کیا ہے کہ اس قسم کی کارروائیاں بین الاقوامی قوانین کی سنگین خلاف ورزی ہیں اور مستقبل میں اس کا سخت جواب دیا جائے گا۔
