کوئی بھی سڑک ہو یا شاہراہ‘ اس کی اہمیت مسلمہ ہے‘ مقام افسوس ہے کہ ایک عرصے سے اس کی اہایت کو نظر انداز کیا جا رہا ہے‘ بات بات پر اسے احتجاج کرنے والے بند کر رہے ہیں ان کو یہ خیال نہیں آتا کہ ان کے اس اقدام سے خلقت خدا کو کس قدر تکلیف ہوتی ہے۔بیمار‘بوڑھے‘بچے اور خواتین جنہوں نے ایمرجنسی کی صورت میں فوراًہسپتال پہنچنا ہوتا ہے‘ وہ بروقت پہنچ نہیں پاتے‘وہ طلبا جنہوں نے امتحان کے پر چے دینے ہوتے ہیں وہ وقت مقررہ پر امتحانی ہال نہیں پہنچ سکتے‘ قصہ کوتاہ روڈ کی بندش سے متاثرہ افراد جھولی اورہاتھ اٹھا اٹھا کر روڈ بند کر نے والوں کو کوستے ہیں‘ یہ بات اپنی جگہ درست ہے کہ کسی بھی مسئلے پر احتجاج کرنا انسان کا حق ہے‘پر کیا یہ حق کسی تہذیب یافتہ طریقے سے ادا نہیں کیا جا سکتا کہ سانپ بھی مر جائے اور لاٹھی بھی نہ ٹوٹے‘ تمام سیاسی پارٹیوں کے کرتا دھرتا آپس میں مل بیٹھ کر شہر کے کسی مرکزی مقام کو چن سکتے ہیں کہ جہاں اگر وہ اپنے کسی معاملے کو اجاگر کرنے کے لئے احتجاج کرنا چاہیں تو وہاں جمع ہو کر اپنے دل کی بھڑاس نکال لیا کریں‘ اس روش میں تمام طبقوں کا فائدہ ہو گا اور نہ تو کوئی ٹریفک کا مسئلہ پیدا ہوگا اور نہ عوام اور پولیس میں تصادم کا خدشہ۔
