نیو کراچی کے علاقے فور کے چورنگی کے قریب ریسٹورنٹ پر موٹر سائیکل سوار ملزمان کی فائرنگ سے خاتون سمیت دو افراد زخمی ہو گئے۔ واقعے کے بعد علاقے میں خوف و ہراس پھیل گیا۔
پولیس کے مطابق زخمیوں کی شناخت 35 سالہ سمیرا اور 18 سالہ عمران کے نام سے ہوئی ہے۔ دونوں کو فوری طور پر طبی امداد کے لیے اسپتال منتقل کر دیا گیا ہے، جہاں ان کی حالت خطرے سے باہر بتائی جا رہی ہے۔
ابتدائی تفتیش کے مطابق ملزمان موٹر سائیکل پر سوار تھے اور انہوں نے ایک مخصوص ریسٹورنٹ کو نشانہ بنا کر فائرنگ کی۔ پولیس حکام کا کہنا ہے کہ اسی ریسٹورنٹ کو ماضی میں بھتے کی پرچیاں بھی موصول ہو چکی ہیں، اور اس حوالے سے اجمیر نگری تھانے میں بھتہ خوری کے مقدمات بھی درج ہیں۔
واقعے کے بعد پولیس نے جائے وقوعہ کو گھیرے میں لے کر شواہد اکٹھے کرنا شروع کر دیے ہیں اور قریبی سی سی ٹی وی فوٹیج حاصل کی جا رہی ہے۔ ممکنہ طور پر واقعہ بھتہ نہ دینے پر دھمکی آمیز حملہ ہو سکتا ہے۔
پولیس کا کہنا ہے کہ مزید تحقیقات جاری ہیں اور جلد ہی ملزمان کو گرفتار کر لیا جائے گا۔
