کراچی، شہر قائد کے علاقے اختر کالونی سگنل کے قریب ٹریفک کے المناک حادثے میں موٹر سائیکل سوار تین بہن بھائی جاں بحق ہوگئے۔
کراچی کے علاقے ڈیفنس تھانے کی حدود اختر کالونی سگنل کے قریب واٹر ٹینکر کے اناڑی ڈرائیور نے موٹر سائیکل سوار کو روند ڈالا جس کے نتیجے میں اس پر سوار 2 بھائی اور ایک بہن موقع پر ہی جاں بحق ہوگئے، حادثے کا ذمہ دار ڈرائیور فرار ہونے میں کامیاب ہوگیا۔
حادثے میں جاں بحق ہونے والوں کی لاشوں کو ضابطے کی کارروائی کے لیے جناح ہسپتال منتقل کردیا گیا، جہاں ان کی شناخت 26 سالہ حسین احمد، 19 سالہ ذیشان احمد ولد پرویز احمد جبکہ بہن کی شناخت 12 سالہ سدرہ کے نام سے ہوئی جو کہ گلشن اقبال مشرق سنٹر کے قریب واقعے واٹر بورڈ کالونی کے رہائشی تھے۔
متوفین کے والد پرویز احمد واٹر بورڈ کے ملازم ہیں، حادثے کی اطلاع اہلخانہ کو ملی تو کہرام مچ گیا، خواتین شدت غم سے نڈھال ہوگئیں جبکہ اہل محلہ اور رشتے داروں کی بڑی تعداد افسوسناک واقعے کی اطلاع ملنے پر غمزدہ خاندان کے گھر پہنچ گئی اور واقعے پر اپنے شدید غم و غصے کا اظہار کیا۔
اطلاعات کے مطابق واٹر ٹینکر کے ڈرائیور نے قیوم آباد کے پی ٹی انٹر چینج فلائی اوور اترتے ہوئے اختر کالونی سگنل جانے والے ٹریک پر موٹر سائیکل کو روندنے سے قبل 2 کاروں کو بھی ٹکر مار کر تباہ کر دیا جس میں ایک کار الٹ بھی گئی جسے موقع پر موجود افراد نے سخت جدوجہد کے بعد سیدھا کیا اور بعدازاں اس میں سوار افراد کار سے باہر نکلے تاہم دونوں کاروں میں سوار افراد معجزانہ طور پر محفوظ رہے۔
