گلگت: خالد خورشید کو وزیراعلیٰ گلگت بلتستان منتخب کرلیا گیا۔
وزیراعلیٰ کو اسمبلی اجلاس میں اراکین کے ڈویژن طریقہ کار سے منتخب کیا گیا۔
اسمبلی اجلاس کی صدارت سپیکر امجد زیدی نے کی، اپوزیشن کی طرف سے پیپلزپارٹی کے امجد ایڈووکیٹ امیدوار تھے۔
وزیراعلیٰ کے چناؤ کے عمل میں 31 اراکین اسمبلی نے حصہ لیا، خالد خورشید کو 22 اور امجد ایڈووکیٹ کو 9 اراکین کی حمایت حاصل ہوئی۔
ذرائع کے مطابق پیپلزپارٹی کے امجد ایڈووکیٹ اپوزیشن لیڈر منتخب ہوئے۔
واضح رہے کہ ایڈووکیٹ خالد خورشید گلگت بلتستان اسمبلی کے حلقہ 13 استور 1 سے پاکستان تحریک انصاف کے ٹکٹ پر کامیاب ہوئے ہیں۔ خالد خورشید ضلع استور کے علاقے رٹو سے تعلق رکھتے ہیں۔
ایڈووکیٹ خالد خورشید گلگت بلتستان کے چیف کورٹ کے سابق جج جسٹس ریٹائرڈ خورشید کے صاحبزادے ہیں۔ خالد خورشید نے 2018 میں پاکستان تحریک انصاف میں شمولیت اختیار کی تھی۔
خیال رہے کہ گزشتہ دنوں پاکستان تحریک انصاف سے تعلق رکھنے والے امجد زیدی گلگت بلتستان اسمبلی کے اسپیکر اور ںذیر احمد ڈپٹی اسپیکر منتخب ہوگئے تھے۔
