گلگت: گلگت بلتستان کے نومنتخب کابینہ ارکان نے حلف اٹھا لیا ہے، گورنر راجا جلال حسین نے اراکین سے حلف لیا۔
وزیراعظم عمران خان نے تقریب حلف برداری میں خصوصی شرکت کی۔
تفصیلات کے مطابق وزیراعظم عمرن خان نے گلگت بلتستان میں کابینہ کی تشکیل کی منظوری دی جس کے بعد منتخب ہونے والے کابینہ ارکان نے حلف اٹھا لیا۔
فتح اللہ، راجا ناصر عباس، سہیل عباس، شمس لون، راجامحمد زکریا اور حاجی شاہ بیگ کو کابینہ میں شامل کیا گیا ہے۔
اس کے علاوہ جاوید مناوا، وزیر کلیم، اور راجا اعظم کو بھی کابینہ کا حصہ بنایا گیا ہے۔
تمام نو منتخب اراکین سے گلگت بلتستان کے گورنر راجا جلال حسین نے حلف لیا۔
دوسری جانب گلگت بلتستان انتخابات میں پیپلز پارٹی اور مسلم لیگ ن کو شکست دینے کے بعد پی ٹی آئی کی جانب سے وزیر اعلیٰ جی بی کے عہدے کے لیے خالد خورشید کو نامزد کیا گیا تھا جو دو دن قبل وزیر اعلیٰ جی بی منتخب ہو گئے ہیں۔
وزیر اعلیٰ کے چنا ؤکے عمل میں 31 اراکین اسمبلی نے حصہ لیا، خالد خورشید کو 22 اور پیپلز پارٹی کے امجد ایڈووکیٹ کو 9 اراکین کی حمایت حاصل ہوئی، جس کے بعد امجد ایڈووکیٹ اپوزیشن لیڈر منتخب ہوئے۔
منتخب ہونے کے بعد نو منتخب وزیر اعلیٰ خالد خورشید نے کہا کہ آئندہ 5 سال عوام کو پی ٹی آئی کی صاف و شفاف حکومت نظر آئے گی، اپوزیشن کو دعوت دیتے ہیں کہ آئیں اور ہمارا بازو بنیں۔
